جێگرا پارتا چاكسازیا توركومانی: كه‌ركوك وه‌كى سه‌رده‌مێ رژیما به‌عس لێ هاتیه ده‌ستێ چه‌كدارێن بیانى دا
ئه‌ڤرۆ نیۆز،ره‌مه‌زان هه‌رنى :
جێگرا سه‌روكێ پارتا چاكسازیا توركومان ئاشكراکر: زولمه‌كا مه‌زن ل کەرکوکێ هاته كرن و ئه‌و پێكڤه ژیانا ل كه‌ركوكێ هه‌ى نه‌مایه و وه‌كێ سه‌رده‌مێ رژێما به‌عش لێ هاتیه، نوكه‌ره‌وشا وێ یا ئارام نینه،مه داخواز ژ ئه‌ندام و لایه‌نگرێن خوه كریه پشته‌ڤانیا هێزێن پێشمه‌رگه‌ى بكه‌ن بۆ پاراستنا كه‌ركوكێ هه‌روه‌سا سوتنا ئالایێ كوردستانێ رێز نه‌گرتن بۆ ل هه‌مى پێكهاته‌یێن ناڤ كه‌ركوكێ دا و دڤێ هێرشێ دا مه‌زنترین زه‌ره‌ر به‌ركه‌فت ل ئه‌نجامێ رێگرى نه‌كرن ل حه‌شدا شه‌عبى و سوپایێ عیراقێ و چه‌كدارێن بیانى ره‌وش گه‌هشتیه وى راده‌ى،کو خه‌لكێ سڤیل ل ناڤ كه‌ركوكێ دهێته ره‌ڤاندن.
مونا قه‌هوه‌چى جێگرا سه‌روكێ پارتا چاكسازیا توركومانی بۆ ئه‌ڤرۆ نیۆز خویاكر ژی، گونه‌هبارێ سه‌ره‌كى یێ كو كه‌ركوك گه‌هاندیه ڤێ ره‌وشێ ئه‌وه یێ رێك خوشكرى بۆ وان چه‌كدارێن هاتینه ناڤ كه‌ركوكێ خه‌لكێ سڤیل ب كوشتن داى خه‌لك ئاواره و ده‌ربەده‌ر كرى و ره‌وشا وان ئاوارا وه‌ك پێدڤى یا باش نینه و وه‌رزێ سه‌رمایێ گه‌هشتیێ مالێن خه‌لكى هاتینه سوتن،هه‌روه‌سا به‌ره‌یێ توركومانى ل ناڤ كه‌ركوكێ پشته‌ڤانیا حه‌شدا شه‌عبى كریه ده‌ما ل 16 ڤێ مه‌هێ هاتینه ناڤ كه‌ركوكێ ئه‌م دژى شه‌رو كوشتنیێ نه مه دڤێت ب رێیا گفتوگویێ چاره‌سه‌ریا ره‌وشا كه‌ركوكێ بكه‌ین.
مونایێ ئاشكراکر ژی،ژبه‌ر زۆریا چه‌كداران ل ناڤ كه‌ركوكێ پتر ره‌وش ئالوزكریه هه‌ر لایه‌نه‌كێ زولمێ دكه‌ت و لایه‌نێ دى تومه‌ت باردكه‌ت و زه‌ره‌مه‌ند ژى خه‌لكێ سڤیلن ل ناڤ وێ پارێزگه‌هێ له‌ورا پێدڤیه خه‌لك خوه بپارێزیت ئه‌وێن نها ل ناڤ كه‌ركوكێ گه‌له‌ك زولمێ ل خه‌لكى دكه‌ن هه‌ره‌شه‌یا كوشتنێ ل سه‌ر ژیانا وان كه‌سا هه‌یه كو نوكه ل كه‌ركوكێ ماینه.
قه‌هوه‌چیێ راگه‌هاند ژى،ئه‌ندام و لایه‌نگرێن به‌ره‌یێ توركومانى په‌یوه‌ندیا به‌رده‌وام ل گه‌ل مه دكه‌ت كو ل سیاسه‌تا سه‌ركردێن خوه درازى نینه ل ناڤ به‌ره‌یێ توركومانى و رۆژا گرتنا كه‌ركوكێ وان پشته‌ڤانیا حه‌شدا شه‌عبى كریه هه‌روه‌سا پشكدارى ئاهه‌نگێن حه‌شدا شه‌عبى بووینه،له‌ورا ئه‌وێن پشته‌ڤانیا حه‌شدا شه‌عبى كربیت ئه‌ڤرۆ یێ زولمێ ل خه‌لكى دكه‌ت ل ناڤ كه‌ركوكێ و پشته‌ڤانیا شه‌ر و ئالوزیان دكه‌ن و برایه‌تیا كه‌ركوكێ تێك دده‌ن.