جێگرێ بەرێ یێ ئەردۆگانی: ئەردۆگان ئەگەرێ سەرەکی یێ قەیرانا نھا یا تورکیا یە
ئەڤرۆ نيوز:
عەبدوله‌تیف شەنەر ئەندامێ پەرلەمانێ تورکیا و جێگرێ بەرێ یێ ئەردۆگانی د داخۆیانیەکێ دا راگەھاند کو سەرۆک کۆمارێ تورکیا ب سیاسەتا خوە یا شاش کو وەسا نیشا ددەت ژ بەر گەلێ تورکیا دژبەریا ئەمریکا دکەت بوویە ئەگەرێ قەیرانەکا مەزن ل تورکیا و گۆت: (ئەردۆگان و ھەڤالێن وی تورکیا تووشی قەیرانەکا مەزن کرینە، ھەکە بلەز پێداچوونێ د سیاسەتا خوە دا نەکەن دێ تورکیا تووشی کارەساتەکا مەزن بیت، چونکو بلندبوونا بھایێ دۆلاری کارتێکرن ل ژیانا خەلکێ ھەژار کریە و ئەڤرۆکە گەلەک کەس نەشێن پێدڤیاتێن سەرەکی یێن ژیانێ بۆ خوە دابین بکەن، لێ ئەردۆگان و مالباتا وی د کۆچکان دا دژین و نزانن کا خەلک چاوا ژیانا خوە یا رۆژانە دەرباز دکەن).
ناڤبری ئەو یەک ژی دیار کر کو ب درووشمان و ھەلویستێن شاش سیاسەت ناھێتە کرن، دڤێت سیاسەت ل سەر بنەمایێن زانستی و راستیا نھا یا جیھانێ بھێتە کرن، مخابن ھەموو بەرنامێن ئەردۆگانی شاش بوون و نھا ل سووریێ ژی ئاریشێن مەزن بۆ تورکیا دروست بووینە و ئەردۆگان دخوازیت ل سووریێ مە تووشی شەرەکێ دی بکەت کو ئاشکرایە وی شەری ژی چو ئەنجامێن خوە بۆ مە نابن و گۆت: (نھا گەلەک کەسێن نێزیکی ئەردۆگانی ژ بەر ڤێ قەیرانا ل تورکیا شیاینە مفایەکا باش یا ئابووری وەربگرن و کەلوپەلان ب رەنگەکێ گرانتر ژ بھایێ خوە بدەنە وەلاتان و رۆژانە ب ملیۆنان دۆلار پارە قەزەنج دکەن و خەلکی ژی نان نینە بخووت).
جێگرێ بەرێ یێ ئەردۆگانی و ئەندامێ پەرلەمانێ تورکیا داخواز ژ ھەموو پارتێن سیاسی یێن تورکیا ژی کر کو ل ھەمبەر سیاسەتێن شاش یێن ئەردۆگانی بێدەنگ نەبن و پشتەڤانیێ ل داخوازیێن خەلکی بکەن و سنۆرەکێ بۆ ئەردۆگانی و ھەڤالێن وی دانێن دا رەوشا تورکیا ژ یا نھا خرابتر لێ نەھێت.
