جێگرێ بەرێ یێ ئەردۆگانی ئەگەرێن تێکچوونا قۆناغا ئاشتیێ ئاشکرا دکەت
ئەڤرۆ نيوز:
حسێن چەلیک جێگرێ بەرێ یێ سەرۆکێ ئاکپارتیێ د داخۆیانیەکێ دا بۆ دەزگەھێن راگەھاندنا تورکیا دیار کر کو PKK دخواست ب رێیا دانوستاندنان و قۆناغا ئاشتیێ مە بخاپینیت و خوە بۆ چالاکیێن مەزن یێن تیرۆرستی د ناڤ باژێران دا بەرھەڤ بکەت مە ئاگاھیێن تەمام وی دەمی ژی ل بەر دەستان ھەبوو کو وان مفا ژ رەوشا بێ شەریێ وەردگرتن و چەک و تەقەمەنی ل باژێرێن باکوری بجە دکرن و گۆت: (ھێزێن ئێمناھیێ ب تەمامی چاڤدێریا چالاکیێن PKK دکرن و گەلەک کەس وی دەمی ژی ھاتنە گرتن لێ مە ب ھەموو رەنگەکێ بزاڤ دکر کو قۆناغا ئاشتیێ ژناڤ نەچیت. ب تایبەتی سەرۆک وەزیرێن وی دەمی بەرێز ئەردۆگان گەلەک یێ رژد بوو کو دڤێت ئەم ب رێیا دانوستاندنان پرسا کوردی و گەلەک پرسێن دی یێن تورکیا چارە بکەین، لێ مخابن بەرپرسێن PKK ژ بۆ ئاشتیێ ئامادە نەبوون و ئەو دلسۆزێ کوردان ژی نینن).
جێگرێ بەرێ یی سەرۆکێ ئاکپارتیێ ئەو یەک ژی دیار کر کو وان دڤیا چەک و تەقەمەنیان ل باژێرێن باکور بجە بکەن و پاشی ژی گەفان ل مە بکەن دا ئەم داخوازیێن وان قەبوول کەین، ژ بەر ھندێ ژی ئەو دلسۆزێ ئاشتیێ نینن و باوەریا وان ب ئاشتیێ نینە و ئەو بوونە ئەگەر کو قۆناغا ئاشتیێ ژناڤ بچیت و گۆت: (ئاشتی ب گەفان و پیلانان بجە نابیت، یێن کو ل رەخەکێ بەحسێ ئاشتیێ بکەن و ل رەخێ دی بزاڤێ بکەن ب زۆرێ چەکی مە نەچار بکەن داخوازیێن وان قەبوول کەین دێ چاوا پرسا کوردی چارە کەن، ھەکە براستی بەرپرسێن PKK خەمخۆرێ کوردان و ئاشتیێ بان قۆناغا ئاشتیێ ژناڤ نەدچوو، لێ پشتی پیلانێن وان ئاشکرا بوون دەولەت ژی نەچار ما کو ب رێیا ئۆپەراسیۆنان و پێرابوونێن ئێمناھیێ بەرەڤانیێ ژ وەلاتیێن خوە بکەت).
حسێن چەلیک ئەو یەک ژی نەڤەشارت کو ئیمرالی و قەندیل و جەماعەتێن HDP وەک ئێک ھزر ناکەن و د ناڤبەرا وان دا سەبارەت ب چاوانیا ئاشتیێ و چارەکرنا پرسا کوردی ئالۆزیێن مەزن ھەنە، بەرپرسێن PKK یێن ل قەندیلێ گوھداریا ئۆجەلانی ناکەن، چونکو دەمێ ئۆجەلانی بەرنامێ خوە بۆ ئاشتیێ ئاشکرا کری وان بەرھەڤی بۆ شەرەکێ مەزن دکرن و رۆژانە ژی بەرپرسێن وان یێن ل قەندیلێ گەفا شەری دکرن، بێگومان د دەمەکێ وەسا دا دەولەت ژی نەشێت بەردەوامیێ بدەتە قۆناغا ئاشتیێ و نەچارە کو بەرەڤانیێ ژ ئێکەتیا ئاخا خوە بکەت و گۆت: (یێن نوکە دبێژن دەولەت ژن و زارۆیان دکوژیت بلا ل خوە ڤەگەرن کا بۆچی وان چەک برنە ناڤ مالێن خەلکی ڤەشارتن و بوونە ئەگەر کو شەر بکەڤیتە ناڤ باژێران، ھەکە PKK ئەو پیلان ل دژی دەولەتێ نەگێرابا و د سەرکەڤتنا قۆناغا ئاشتیێ دا دلسۆز با ئەڤرۆکە ل تورکیا چو شەرەک روو نەددا، لێ مخابن ئەو بوونە ئەگەر جارەکا دی تورکیا بەر ب شەرەکی نەخواستی ڤە بچیت).
