جێگرێ سكرتێرێ حزبا زه‌حمه‌تكێشێن كوردستانێ:نێچیرڤان بارزانی شیایه سه‌رۆكایه‌تیا هه‌رێمێ بكه‌ته جهێ كۆمڤه‌كرنا هه‌موو ئالیێن سیاسی
ئه‌ڤرۆ، سلێمانیێ، عه‌زیز هه‌ورامی
سه‌رۆك هه‌رێما كوردستانێ، نێچیرڤان بارزانی د ده‌ستپێشخه‌ریه‌كێ دا داخوازا ڕوونشتنا هه‌موو ئالیێن سیاسی دكه‌ت و ب دووماهی ئینانێ ب وێ ناكۆكیا د ناڤبه‌را ئالیان دا هه‌ی، جێگرێ سكرتێرێ حزبا زه‌حمه‌تكێشێن كوردستانێ ژی دبێژیت، پشته‌ڤانیێ ل ده‌ستپێشخه‌ریا سه‌رۆكێ هه‌رێما كوردستانێ دكه‌ین.
سه‌عید خالد، جێگرێ سكرتێرێ حزبا زه‌حمه‌تكێشێن كوردستانێ بۆ ڕۆژنامه‌یا (ئه‌ڤرۆ) گوت” پێشوازیێ ل هه‌ر ده‌ستپێشخه‌ریه‌كێ دكه‌ین ب تایبه‌تی ده‌ستپێشخه‌ریا نێچیرڤان بارزانی، سه‌رۆكێ هه‌رێما كوردستانێ، به‌رده‌وام هیڤیا مه ئه‌وه ده‌زگه‌هێ سه‌رۆكایه‌تیا هه‌رێما كوردستانێ وه‌كو ده‌زگه‌هه‌كێ نیشتمانی د خه‌ما پرسێن چاره‌نڤیسساز دابیت و ب ئێك چاڤ سه‌حكه‌ته هه‌موو سالیێن سیاسی، ل ده‌مێن بۆری ژی دا شیایه ڕۆلێ نیشتمانی ببینیت و گۆتار و كریارێن وی ل ده‌ف هه‌موو هێزێن سیاسی ب ئۆپۆزسیۆن و ده‌ستهه‌لات ڤه د قه‌بوولكری نه”.
گوت ژی” ب دیتنا مه نوكه ده‌مێ ده‌ستپێشخه‌ریا سه‌رۆكێ هه‌رێما كوردستانێ یه و كوردستانێ شیانێن ڤێ ڕه‌وشێ نینن، پێدڤیه ژی بله‌ز هه‌موو ئالیێن سیاسی ب تایبه‌تی پارتی دیموكراتی كوردستان و ئێكه‌تی نیشتمانی كوردستان، كو به‌رپرسیاره‌تیا سه‌رخستنا قۆناغێ یا هه‌ی و پێكڤه د ده‌ستهه‌لاتێ دانه، دگه‌ل هه‌ڤدوو كۆمببن و ده‌لیڤه‌یه‌ك یا هاتیه پێش كورد پێكڤه ل به‌غدا بشێن پشكا خوه ژ ئه‌وا د دستوورێ ئیراقێ دا هاتی و مافێن خوه بده‌ستڤه‌بینن”.
ناڤبری ئاماژه‌كر” به‌رده‌وام هاتیه گوتن جوداهی یا ئاسایی یه به‌لێ ئه‌وا نه‌ئاسایی ئه‌م وه‌كو ملله‌ته‌ك ل به‌رده‌م ئاسته‌نگێن مه‌زن داین، ڕه‌وشا ده‌ڤه‌رێ یا هه‌ستیاره و دگوهۆڕینێن مه‌زن دایه، پێگه‌هێ كوردان ب ئێكده‌نگیێ دێ ب هێز بیت، به‌لێ ئه‌ڤ ڕه‌وشا نوكه هه‌ی د به‌رژه‌وه‌ندیا چ ئالیان دا نینه، خه‌لكێ كوردستانێ یێ دلته‌نگه كو ئه‌ڤ ڕه‌وشه به‌رده‌وام بیت، گرژیێن د ناڤبه‌را ئالیان دا كاریگه‌ریا خراپ كریه سه‌ر ئابووری و بازاری، به‌رده‌وام ژی مه گوتیه كو هێزا مه د ئێكگرتنا مه دایه چ ل ناڤخوه و چ ل ده‌رڤه ژی وگه‌لێ كوردستانێ ژی پشته‌ڤانه ئه‌ڤ ڕه‌وشا نوكه هه‌ی نه‌مینیت و خالێن هه‌ڤپشك د ناڤبه‌را ئالیێن سیاسی دا یێن هه‌ین و دشیاندایه ڕێكبكه‌ڤن و هه‌موو ئاسته‌نگان لاده‌ن و ب ڤێ چه‌ندێ دێ شێین زالبین ب سه‌ر هه‌موو كێشه و گرفته‌كێ دا و به‌رپه‌ره‌كێ نوو بهێته ڤه‌كرن”.
دیاركر” سه‌رۆكایه‌تیا هه‌رێما كوردستانێ تاكو ئاسته‌كێ باش چه‌تره‌كێ باش بوو بۆ ئالیێن سیاسی، هه‌موو ئالی پێشوازیێ ل ده‌ستپێشخه‌ریا سه‌رۆكێ هه‌رێما كوردستانێ دكه‌ن و ب دیتنا مه پێدڤیه پشته‌ڤانی ل سیاسه‌تا سه‌رۆكایه‌تیا هه‌رێما كوردستانێ بهێته كرن”.
زیره‌ك كه‌مال، شیره‌تكارێ سه‌رۆكێ هه‌رێما كوردستانێ د داخویانیه‌كا ڕۆژنامه‌ڤانی دا ڕاگه‌هاندبوو” سه‌رۆكێ هه‌رێما كوردستانێ به‌رنامه‌یه‌ك یێ هه‌ی وه‌كو ده‌ستپێشخه‌ری و به‌رهه‌ڤی بۆ وێ چه‌ندێ هه‌موو ئالیێن سیاسی كۆمڤه‌كه‌ت بۆ ڕێكخستنا ناڤمالا كوردی، چونكه سه‌رۆكێ هه‌رێما كوردستانێ خوه ب چه‌ترێ هه‌موو ئالیه‌كی دزانیت، له‌وما بزاڤێ دكه‌ت ئالیێن سیاسی كۆمبكه‌ت”.
شیره‌تكارێ سه‌رۆكێ هه‌رێمێ گۆتبوو ژی” سه‌رۆكێ هه‌رێما كوردستانێ دووپاتیێ ل سه‌ر وێ چه‌ندێ دكه‌ت كو پێدڤیه د ئێك هه‌لویست بین د پرسا دانوستاندنێ ل كه‌ل به‌غدا و پرسێن سیاسی و ل سه‌ر هه‌موو پرسان پێدڤیه د ئێكڕێز و ئێكده‌نگ بین، چونكه ئه‌و دێ بیته هۆكارێ وێ چه‌ندێ هه‌م سه‌قامگیریا سیاسی و جڤاكی ل هه‌رێما كوردستانێ زێده‌تر به‌قه‌رار بیت و هه‌م ژی باوه‌ریا خه‌لكی ژی ب قه‌وارێ هه‌رێما كوردستانێ زێده‌تر ببیت و ل سه‌ر ئاستێ نێڤده‌وله‌تی ژی دێ ب هێزتربین و دێ مه هه‌یبه‌ت و شكۆیا زێده‌تر هه‌بیت، له‌وما گرنگه ئێك هه‌لویست و ئێكڕێز بین”.
