جێگرێ سەرۆکێ کوربەندێ ھزری یێ ئیسلامی: داعش دیاردەکا دەمکی یە
ئەڤرۆ نیوز:
د دیارەکێ دا بۆ رۆژناما ئەڤرۆ کو رۆژنامەڤان ئەیاد بەرواری ئەنجام دایە، دکتور عەرەفات کەرەم ڤەکۆلەر و جێگرێ کوربەندێ ھزری یێ ئیسلامی ل کوردستانێ دبێژیت، داعش دیاردەکا دەمکییە و نامینیت و دێ فۆرمەکێ دی ژێ دروست بیت، کا چاوا داعش فۆرمەکێ قاعیدە بوو، دیسا دبێژیت عیراق ھاتە دابەشکرن و شەوتاندن د ناڤبەرا داعش و ماعش (میلیشیێن شیعی) ل عیراقێ، ئاماژێ ددەتە وێ چەندێ ژی کو پشتی لاوازبوونا داعشێ دێ ئێکەتی نیشتمانی کوردستان بیتە ئاریشا کوردان، دبێژیت ژی مالکی و جەعفەری شیعەگەری ل عیراقێ یا بکارئینای و مالکی میلیشیێن ئایدلۆژی دروستکرینە و ھوشداریێ ژی ددەت کو دبیت شەڕەک دناڤبەرا وان میلیشیان و کوردان دا روو بدەت کو دێ ژ شەڕێ داعشێ خرابتر بیت.
دکتور عەرەفات کەرەم بۆ ئەڤرۆ گوت” پێشمەرگەی سەرکەفتنەکا مەزن ل سەر داعشێ یا بدەستڤەئینای و دێ خوە ژ دەڤەرێن کوردی ڤەکێشیت، چونکی ھەیبەتا وێ شکەستـ و رێکخراوەکا تیرۆرستی یا بێ سنۆرە و پێلەکە دێ بەرێ وێ کەڤیتە لوبنانێ و مسرێ و ئوردنێ کو ئەو وەلاتێ دووماھیێ بۆ داعشێ یێ ستراتیژی یە، چونکی ھزرێن ئەبو مێعەب زەرقاوی و محەمەد ئەلمەقدسی ھەموو یێن ل ئوردنێ و بێگۆمان دێ بەرێ وێ کەڤیتە بەغدا ژی”.
ب دیتنا دکتور عەرەفاتی”ھەکە ھات و داعش لاواز بوو، دێ ئاریشەکا دی بۆ کوردان پەیدا بیت، ئەوژی ئێکەتی نیشتمانی کوردستانی یە، راستە پێشمەرگەی ل دەڤەرا زەر گەلەک دەڤەر ستاندن، لێ ئەو دەڤەر ھەر رادەستی کوردان بوون، چ پێشمەرگە شەڕی بکەت و چ یەپەکە و چ شەرڤان شەڕی بکەن، ژ بەر کو چو جوداھی د ناڤبەرا پێشمەرگەی و شەرڤانان دا نینە و ھەردو کوردن و چو پرسێن ئایدیولۆژی و ئایینی تێدا نینن، لێ ل جەلەولا و سەعدیە و دەڤەرێن دی، ئەو دەڤەر ھاتنە رزگارکرن، لێ کەفتنە د دەستێ ( ماعشێ) دا، ئانکو میلیشیێن شیعی و نۆکە کوردان مەزنترین ئاریشە یا ھەی ئەوژی (ماعش)ە کو مەزنترین ھەرەشەیە ل سەر کوردان، ئەو دەڤەر کوردێن سونی نە و بەری دەمەکی وان میلیشیێن شیعی مەلایەکێ کوردێ سونی ل وان دەڤەران کوشت، وەکو ئەندامێ پەرلەمانێ ئورۆپی (ستراوس ستیڤنسون) یێ ئوسکوتلەندی گوتبوو “مالکی ٣٠ ھزار کەسێن عیراقی ل ئیرانێ بۆ شەڕێ ئایدیۆلوژی ل عیراقێ پەروەردەکرن” و ئەوێن نۆکە دەڤەرێن کوردی ئێخستینە بن دەستێ خوە ھەر ژ وان ٣٠ ھزار کەسانە ژ (فەیلەقا بەدر- سەرایا سەلام و لەشکرێ مەھدی…. ھتد) کو ئەو ھەموو میلیشیاتە ژ روویێ دستووری ڤە ژ دەرڤەی قانوونێ نە و ھەکە دەولەتەکا دیموکراسی و مەدەنی بیت، دڤێت ھەموو لەشکەر دبن دەستھەلاتا سەرۆکێ وەزیران دابیت، ئانکو ئەو میلیشیانە ھەموو د شەرعی نینن و شەمخانی کو ئێک ژ زانایێن ئایینی یە ل ئیرانی ب خوە یا گوتی” ھەکە ئەم خوینێ ل عیراقێ و لوبنانێ و یەمەنێ نە رێژین، دێ سوباھی ل ئازەربایجانێ و بلۆجستانێ رێژین” و ئەڤ داخۆیانی یە گەلەک یا ب مەترسی یە”.
ل دۆر وێ چەندێ ئایا رەفتارکرن ل وان دەڤەران ل سەر بنەمایێ ئایدیولۆژی یە نەکو نەتەوی؟ دکتور عەرەفات کەرەم گوت” دەمێ مالکی سەرەدانا ئیرانێ کری، تەھرانێ گەلەک پەسنا وی کر و وەسا دا نیاسین کو سەرکەفتیترین سەرۆک وەزیرێن عیراقێ بوو، چونکی مالکی خزمەتەکا مەزن و ئاشکرا بۆ شیعەگەریێ ل دەڤەرێ کر و بێگومان ل دەڤەرێن کوردستانێ یێن د بن دەستێ ئێکەتیێ دا، دێ شەڕەکێ مەزن د ناڤبەرا کوردان و شیعان ھێتە کرن و ھەکە ببیتە شەڕێ ئایدولۆژی دێ بیتە ئاریشەکا مەزن بۆمە کوردان، چونکی گەلەک کورد یێن ھەین کو شیعەنە و تشتەکێ بەربەلاڤە کو ھزرا ئایدلۆژی یا خەلکی یا زالترە ژ ھزرا نەتەوی و پتریا کوردێن فەیلی ل بەغدا دەنگێ خوە ددەنە دەولەتا قانوونێ و شیعان ب گشتی، ھەتا دناڤ مە کوردێن سونە ژی دا، ھزرا ئایدیولۆژیا سونی ل سەر مە زالترە ژ ھزرا نەتەوی و ئەڤە ئاریشەکا مەزنە، لەوما پێدڤیە بزاڤ بھێنە کرن کو دناڤبەرا مە و شیعان دا نەبیتە ئاریشەکا ئایدلۆژی – ئایینی، بەلکو ئاریشەکا نیشتمانی نەتەوی بیت، ھەکە نە دێ ھێینە دۆڕاندن”.
د بەرسڤا پرسیارەکا ئەڤرۆ دا، ئایا ئیرانێ ل بەرە پرۆژێ خوە یێ شیعەگەریێ ل ھەموو عیراقێ زالکەت؟ ناڤبری گوت”ھەر دەولەتەکا ل سەر بنەمایێ ئایدیولۆژیا ئایینی بھێتە دامەزراندن، دیموکراسی و فرەلایەنیا سیاسی نامینیت و مالکی د ھەشت سالێن حوکمرانیا خوەدا ئەڤ چەندە پەیرەو دکر، نۆکە ئیران دخوازیت شیعەگەریێ ل عیراقێ زال بکەت و پێنگاڤا سعودیێ بۆ ڤەکرنا بالیۆزخانا خوە ل بەغدایێ ژ بۆ وێ چەندێ یە کوب شێت ل بەرامبەر رەوتێ شیعی ب راوەستیت، ژبەرکو ھەرەشا مەزن نۆکە یا ل سەر سعودیێ و وەلاتێن کەنداڤی ھەی و ئیرانێ پێ خوە یێ ل عیراقێ و بەحرێنێ و یەمەنێ و سووریێ و لوبنانێ و پاکستانێ و ئەفغانستانێ ھەی.ئێک ژ سەرکردێن شیعان دبێژیت، دەمێ مەحەمەد ئەلمەھدی دھێت، شەڕێ ئێکێ یێ وی دێ ل گەل کوردان بیت، ئەوا نۆکە ژی د مێشکێ وان دا ئەوە، کو شەڕێ دژی کوردان شەڕەکێ پیرۆزە و ئەو دخوازن ھزرا شیعەگەریێ زالتر بیت ل سەر ھزرا نەتەوی یا کوردی و ل سەر ڤێ چەندێ کاردکەن و دەمێ ل سەر ڤێ چەندێ کاردکەن، دێ کوردێ شیعی کەڤیتە بن کارێگەریا وان، کا چاوا ئیسلاما سیاسی ل سەر ئایدیولۆژیا سنی کاردکەت و ژێیاتیا کەسی بۆ وەلاتی و نیشتمانی نابیت و دەمێ بۆ ھەلگرێ ڤێ ھزرێ بەحسێ ھەرێما کوردستانێ و پێشمەرگەی و پرسێن نەتەوی بکەی، تڕانا پێ دکەن، چونکی ل دەف وی ئایدلۆژیا سونەگەری گرنگترە ژ ھزرا نەتەوی”.
سەبارەت رۆلێ ھندەک سەرکردێن حزبی د حزبێن کوردی دا کا دێ چ بیت، دبێژیت” دێ ئێکەتی بزاڤێ کەت پۆلەکێ نەتەوی بدەتە وی شەڕی، لێ ئاریشا ھەرە مەزن ئەوە ئێکەتیێ شیعە یێن ھەین کو بۆ وان ھزرا ئایینی فەرترە ژ ھزرا نەتەوی وەکو عادل مورادی کو وی چو باوەری ب نەتەوایەتیێ نینە و ل دەف وی کەسەکێ شیعیێ ئیرانی گەلەک ب رێزترە ژ کوردپەروەرکی”.
ل دووماھیێ ھوشداریێ ددەت و دبێژیت”میلیشیێن شیعی دێ بزاڤێ کەن شەڕێ خوە کەنە شەڕەکێ پیرۆز، نابێژم دژی کوردان، بەلکو دژی پرۆژێ سونی کو دێ ھەرێما کوردستانێ ژی ڤەگریت و ھەرێم دێ گەلەک ژێ زیاندار بیت ژی و دێ ژ شەڕێ داعشێ خرابتر بیت، چونکی ئیران یا ل پشت و عیراق وەکو دەولەتەکا شیعی یا ل پشت و داعشێ چو مەرجەعیەت نەبوون، لێ شیعان مەرجەعیەت یا ھەی و (حەشد شەعبی) ب فەتوایەکا سیستانی یا ھاتیە پێکئینان”.
