جێگرێ پارێزگارێ مووسل: پارێزگەھا مووسل چو ھاریکاریا ئاواران نەکریە
ئەڤرۆ:
جێگرێ ئێکێ یێ پارێزگارێ مووسل بۆ ئەڤرۆ دیار کر، دەمێ زومار ھاتیە رزگارکرن، مە سۆز دا خەلکێ خوە، د ماوێ ٢٥ رۆژان دا ئاریشا کارەبێ چارە بکەین، لێ ژ بەر ھەبوونا ئاریشێن تەکنیکی، ھێشتا ئاریشا کارەبێ چارە نەبوویە. پارێزگەھا مووسل چو رۆل نەبوویە د ھاریکاریکرنا ئاواران دا و چو ل بەر دەستێن مە نەبوو ھەتا بشێین خزمەتا خەلکێ خوە بکەین.
عەبدولقادر شنگالی، جێگرێ ئێکێ یێ پارێزگاری مووسل دیار کر، ھەر دەڤەرەکا ل سەر دەستێن پێشمەرگێ کوردستانێ دھێتە رزگارکرن، ئێکسەر ئەم سەرەدانا وێ دەڤەری دکەین، دا ژ نێزیک ڤە واقعی وێ دەڤەرێ ببینین، بۆ ھندێ بشێین بریاران بدەت و کێمترین خزمەتگوزاری بھێنە دابینکرن بۆ وەلاتیان دا کو خەلکێ دەڤەرێ ڤەگەرنە سەر مال و مولکێن خوە.
ناڤبری خویا کر، گەلەک کێماسی ل دەڤوەرێن رزگاری ھەنە و گەلەک پێدڤی ب ھاریکاریێ نە و ئەم کوژمەکێ پارەی تەرخان دکەین بۆ پاقژکرنا ھەر دەڤەرەکێ و گۆت: زیانێن مەزن گەھشتینە دەڤەرێن کوردستانێ و مەزنترین ئاریشە ژی نەبوونا کارەبێ و ئاڤێ و بۆ ڤێ ژی پارەکێ مەزن دڤێت و رەنگە بوودجا سالەکێ یا عێراقی تێرا مە نەکەت.
جێگرێ پارێزگارێ مووسل ئەو ژی خۆیا کر، ل پارێزگەھا مووسل جیاوازیا دناڤبەرا دەڤەرێن کوردستانێ و سەنتەرێ پارێزگەھا مووسل دا ھەی، چونکو د ناڤ سەنتەرێ مووسل دا ئەو زیان وەسا مەزن پێ نەگەھشتینە وەکو یێن گەھشتینە دەڤەرێن کوردستانێ، لێ د ناڤ سەنتەرێ مووسل دا خەلکەک تێدا مایە و دۆرین سێ ملیون کەسان ماینە.
ناڤبری ئەو ژی دیار کر، بوودجا سالا ٢٠١٤ یا پارێزگەھا مووسل نەبوو و یا ٢٠١٥ ژی ژ نوو پەسەند بوویە کو بوودجا گەشەپێدانا ھەرێمان یا پارێزگەھا مووسل دگەھیتە ٣٧٢ ملیار دیناران و ئەڤ کوژمێ پارەی ژی گەلەک یێ کێمە و تێرا ئاڤەدانکرنا ئێک ناحیێ ناکەت، چونکو ھەر دەڤەرەکا کەڤتیە دەستێن تیرورستێن داعش دا، یا ھاتیە وێرانکرن و گەلەک پارە بۆ ئاڤەدانیێ دڤێت.
ئاشکرا کر، پارێزگەھا مووسل بۆ ئاواران چو نەکریە، چونکو مە چو بریارا نەبوون بشێین ھاریکاریا ئاواران بکەین، ژ بەر کو ئەڤ کوژمێن پارەی و ھاریکاریێن دھێنە تەرخانکرن ژ لایێ حوکمەتا ھەرێما کوردستانێ و حوکمەتا عیراقی ژی نە ب رێیا پارێزگەھا مووسل بووینە.
شنگالی زێدەتر گۆت: مووچێ ھەموو فەرمانبەران دھێتە مەزاختن، ب تنێ ئەو فەرمانبەر نەبن یێن ھاتینە پشتراستکرن کو دەست ل گەل تیرورستێن داعش ھەنە و مووچێ وان ژ لایێ بەغدا ڤە دھێتە برین، لێ مە پێزانینێن دروست نینن ھەتا نوکە مووچی چەند فەرمانبەران گەھشتینە تیرورستێن داعش و ھاتیە برین، چونکو ھەر ھندەک گرێدای وەزارەتەکێ نە.
