جەلادێ زیندانـێ گۆت، ئـەز چەند كێڤلان دانمە تـە، دێ هند پەرداغێن ئاڤـێ دەمە تە تۆ ڤەخۆی
سالار محەمەد دۆسكی:
3-8
ئەم كوشتینە؟ گرتینە؟؟ ئەم ل گەل پێشمەرگەی چووینە؟؟ هەر نوزانیت ئەم كیڤە چووینە، ل گوندی گۆتنێ مە دو كەس دەستەسەركرینە و كەسەك نەوێریا هەر باخفیت و خەلكێ گوندی باوەری پێ نەبوو باخفن و گۆتن رەنگە ئەڤە ئاخفتنا ژ مە دروست بكەن و دا دو گونەهباران دروست بكەن، سێ رۆژا ئەم هێلاینە وێ ژووری و دوڤدا ئەم ڤەگوهاستین فرقێ ل باژێرێ زاخۆ و دەمێ ئەو هێز چوویە گوندی ئەوا زانی (فەیزوللا) نەخوش نەبوویە و دەمێ ل گوندی گازیكەر (فەیزوللا) گۆتێ توویێ نەخوشی گۆتێ نەخێر و ئەو گەهشتنە وێ باوەریێ كو چ راستی بۆ بابەتێ نەخوش كەفتنا وی هەر نینە و دەمێ ئەم برینە زاخو دووبارە ڤەكولینێ دەستپێكر و شەق و پێن و قوتان و یاری ب مەكرن و گۆتن (فەیزوللا) یێ مریە یێ ساخە؟؟ و ئەم قوتاین و قوتانا دەستپێكێ ژی پیچەكێ یا نەخوشە چونكە هەتا لەشێ مرۆڤی ل گەل قوتانێ خوە دگونجینت، و دوڤدا ئەم ئینان ل زالگەها گومركێ ل زاخو ئاڤاهیەكێ بەران هەبوو و ئەمە ڤەگوهاستینە وی ئاڤاهی و ئەم 15 رۆژان ماینە دناڤ وی ئاڤاهی دا و خەلكەكێ دی ژی هەبوو گرتی وی ئاڤاهی دا و پشتی 15 رۆژا نەبێژە موختارێ گوندێ بێناتە گازی كریە و ئەوی ل گەل هندەكێن گوندی گۆتیێ ئاریشێن گوندی هەمی ئەڤ هەر دو كەسە دكەن و ئەگەر بەلا ڤا ژ گوندی بهێتە ڤەكرن دێ گوندێ مە ئارام بیت و ئەم بابەتی نوزانین و پشتی 15 رۆژا ئێك ب كولاڤ و دەرسوك نڤیسارەك ئینا و دەستەكێ بەرگیزان ژی ل بەرە و گازیكر (مراد و وەحید) مە گۆتێ بەلێ گۆت رابن مە گۆتێ دێ چ كەین؟؟ گۆت هوون خلاس بوون و دی هەوە ئازاد كەین، پولیسەك و جندیەك دانە ل گەل مە و مە باوەركر و مە گۆت ئەڤە كوردە و كولاڤ و دو دەرسوكێن ل سەری و ئەو چووینە ترۆمبێلێ دا و ئەوێن ل سینگی و ئەمێ ل پشتێ و ئەم دشیاین ب رەڤین و دەستین مە دڤەكری بوون بەلێ مە گۆت دێ مە ئازاد كەن بۆچیە ئەم ب رەڤین، و ترمبێل هات و ئەم برینە ئەمنا دهۆكێ ڤە و نڤیسار ڕادەستی كەسەكی كر، و ئەوی گۆتێ ها ئەفە (مراد و وەحید)ن؟، دەنگێ خوە ل مە بلندكر و مە حەیتاندن و ئەو شەڤ بوری و رۆژا پاشتر ئەم گازی ڤەكولینێ كرین و گۆت وەرن(جەمال قەدشی) و گەلەك ناڤ گۆتن ئەڤە كینە؟ مە گۆتێ ئەم نەنیاسین، بەلێ جەمالەك هەیە و كورێ كەسەكێ مەسیحی یە و ئێكسەر ئاخفتنێن كرێت گۆتن، و گۆت تویێ ل گەل جەمال قەدشی ب شەڤ و رۆژ نوكە دبێژی ئەم نەنیاسین، گۆت (فەیزوللا) كیە؟ من گۆتێ كەسەكێ گۆندیێ مەیە و دەركەفت ئەو ژی درەوە، ژوورەكا گەلەك بێ سەرۆبەر هەربوو و ئەز برمە وی ژوورێ و دەستێن من كەلامچەكرن و ب دەرجەكێ ڤە گرێدام و ئەو ژوور گەلەك یا پیس بوو و گەلەك یا بێ سەرۆبەر بوو و ناڤ بەینەكێ كەسەك هات و من راوستیا ب پێنا، هەمان قوتان كور خالەتێ من ژی یێ دخوت و و پشتی ماوەكی برمە دەف ئەفسەرێ ڤەكولینێ و ئەو ئەفسەر رابوو سەر خوە و چەند شەقێن ب قوت دانانە من و گۆت باوەر بكە، تو راستی نە بێژی دێ تە كوژم و ئەم حەفت رۆژا ماینە ل وێرێ و هەمی جورێن ئەشكەنجەدانێ و ئاخفتنێن كرێت و برس و ترس و هەر تشتەكێ ڤیایی ل وێرێ هەبوو، و هەتا ڤێرێ مە چ دانپیدان و هەر تشتەك نە گۆتیە، بابەتێ مە یێ زەلال بوو و یا ئاشكرا بوو و درەوا مە ژی درەو دەركەفت و پشتی رۆژا حەفتێ ب دووماهی هات ئەم دەرخستین و ئەم داناینە بەر دیوارەكی و سەرێن مە تراشین وێنە بوومە گرتن و مە دیت ئەم هاڤێتینە ترۆمبیلەكا گرتی دا و ئەم هەر تشتەكی نوزانین دێ چ كەین و كیڤە چین و ئەو ژوورا بەری نوكە من بەحس ژێ دكر كەسەك ل دەف من نەبوو و بتنێ بووم و بابێ من و خالەتا من دوف من ڕا هات بووم و بابێ من خودێ ژێ رازی دگۆت ئەز هاتمە نێزیك وی دەرگەهی ئەو ژوورا تو تێڤە ڤە و ئێكێ ئەمنێ پێنەك ل من دا و هاڤێتم و بتنێ پرسیارا من كریە، دا ژبیر نەكەم و پشتی ل ترۆمبێلێ سواركرین و هاژووت و چاڤێن مە گرێدای و پشتی ماوەكی ئەم ئیناینە خوارێ و ئەم برینە بەر دیوارەكی و ئەو جه كەركووك بوو و ئەم گەلەك هێلاینە ل سەر پێن خوە و كەسەك هات گۆت رابن و ئەم رابووین و جلكێن مە ژ بەر مەكرن، و بتنێ جلكێ كورت و قەمیسەك هێلانە ل بەرمە و هاڤێتمە ژوورەكێ ڤە و ئەو ژوور سی ب چارە و جهێ مرۆڤان تێدا نینە و چەندین مرۆڤێن تێدا و هەر هەمیان ریهێن وا دبەردای بوون و دبی سەرۆبەر بوون و من هزرین خوە كرن، و من گۆت بخودێ ئەڤ كەسە دێ من خوون، پشتی ئەوێن ئەمنێ كریمە ژوور و دەركەفتین ئەو كەسێن دناڤ ژوورێ ڤە هاتمە من و ئێك (سەگڤان، تاها) خەلكێ زاخۆ بوون و (حسێن) شەبەك بوو و بەزی نە من و ئاخفتنەكا بەر بەلاڤ دناڤ زیندانێ دا هەبوو و هەر كەسەكی هاتبا زیندانكرن ئەوێن زیندانێ ڤە دا بێژنێ لێبورین ناهێت؟؟ من گۆتێ بەلێ هەما لێبورینا دبەریكا من دا و ئەو د حەق بوون چونكە ئەوان دنیا گەلەك ژ مێژە نە دیت بوو، من تەماشەكەرێ هەر هەمی دبریندار بوون و ماوێ حەفتیەكێ مامە ل گەل ئەوان هەڤالان و شەڤەكێ ناڤێ من هاتە خواندن و هەر كەسەكێ ناڤێ وی دهێت خواندن ئەو چوو، ناڤێ من خواند و هەر دو چاڤێن من گرێدان و ژوو ردا برمە خوار و كور خالەتێ من ژی ل گەل من نە بەلێ ئەم نەبرینە دەف ئێك و ئەز برمە ژوورەكێ و گۆت راوستە و من هەستپێكر كەسەك دناڤ ژوورێ دا هەیە و یێ روینشتی یە و نا ئاخفت و ئەو كەس زەلامێ ڤەكولینێ یە و نێزیك 30 خولەكا هێلامە ژ پێرڤە و ئەو كەسێ ژوور ڤە نە ئاخفت، و دوڤدا ئێك هات و گۆتە من بووتە بێژم من گۆتێ بەلێ گۆت ئەگەر دێ راستی بوومە بێژی ئەم تە ناقوتین و ئەگەر تو راستی نە بێژی دێ قوتانێ خویی و ئەڤە ب زمانێ كوردی گۆتە من و من سویند خوار ئەگەر تشتەكی بزانم.
