جەمال مورتکە – پێشمەرگەیان سەلماند کو کورد بن دەستیێ قبول ناکەن
ئەڤرو نیوز ، نەوزاد ھلوری:
ئەڤرو ب بەرھەڤبوونا ھەر ئێک ژ سیروان بارزانی بەرپرسێ مێحوەرێ گوێر – مەخمور ، نەوزاد ھادی پارێزگارێ ھەولێر ، جەمال مورتکە بەرپرسێ ھێزا پاراستنا ھەولێرێ ، چەند بەرپرسێن حزبی ، حکومی ، سەربازی ، پەرلەمانتار ، کەسایەتی ، کەس و کارێن شەھید ، کەساتیێن عەرەب و جەماوەرەکێ زور رێورسمێن بیرئانینا شەھیدان ل بارەگایێ ھێزا پاراستنا ھەولێر ب رێڤەچوو ، د داخویانەکێ دا بەرپرسێ ھێزا پاراستنا ھەولێر بۆ ئەڤرو نیوز دیارکر کو پێشمەرگەی ب گیانێ خوە سەلماند کو کورد ژێردەستیێ قبول ناکەن و خەباتا وان یا ئایندە بو ئەنجامدانا ریفراندوم و سەربەخویێ یە.
رەوەند شوانی بەرپرسێ ھێزا پاراستنا ھەولێر دیارکر کو ئەڤرو ب بەرھەڤبوونا ھژمارەکا بەرپرسێن حکومی و حزبی مەراسیما بیرئائینا شەھیدان ل ھەولێر ب رێڤەچوو و بۆ ئەڤرو نیوز گۆت: (مەرەم ژ ئەنجامدانا رێورسمێن بیرئانینا شەھیدان ئەو بویە کو رێز ل خەبات و قوربانیدانا ئەوان پێشمەرگەیان بھێتە گرتن کو گیانێ خوە کریە قوربانی پێخەمەت پاراستنا ئاخ و سەر و مالێ وەلاتیان و دەستڤەئینانا ئەڤێ ئازادیا کو نھا کوردستان تێدا دبوریت ، ئەڤ رێورسمە ژی ل بارەگایێ ھێزا پاراستنا ھەولێر ھاتبوویە ئەنجامدان و تێدا کومەکا گوتاران ھاتنەخواندن)
ژلایەکێ دنڤە “جەمال مورتکە “بەرپرسێ ھێزا پاراستنا ھەولێر بۆ ئەڤرو نیوز گۆت: (پێشمەرگێن قارەمان ھەر ژ دەستپێکا درۆستبوونا خوە ھەتا نھا ب دلسووزی و قارەمانی و بێی جوداھی ئول و نەتەوەیی خەبات و قوربانیدان پێخەمەت پاراستنا کوردستانێ کریە و ئەوان سەلماند کو چوو جاران کوردان نەڤیایە ژێردەستیێ قبول بکەن)
زێدەتر گۆت: (پێشمەرگێن قارەمان د ھەموو قوناغێن خەباتا چەکداریا خوە دا بتنێ مەرەم پاراستنا سەر و مالێ وەلاتیان بوویە و نەڤیایە و رێک ژی نەدایە چوو ھێز ئاخا ھەرێما کوردستانێ داگیر بکەن ، و پشتی کو داعش ژی ھاتی دیسان پێشمەرگەی دووبارە قارەمانیا خوە بو ھەموو جیھانێ سەلماند و رۆژانە بو پاراستنا وان بەر ب خوە گوریکرنێ ڤە دچن و ئەم وەکو پێشمەرگە دیسان دوپات دکەین ھەتاکو دلوپەکا خوێنێ دگیانێ مەدا مایە بەرەڤانیێ ژ سەر و مال و ئاخا ھەرێما کوردستانێ بکەین)
ناڤبری د درێژاھیا ئاخفتنێن خودا دا گۆت: (ئەڤرو پێشمەرگێن قارەمان بەردەوامیێ لسەر خەباتا چەکداری یا خوە یا ھەردوو شورشێن ئیلون و گولانێ ددەن ، ئەگەر ل وی دەمی دەستڤەئینانا خەون و خوزیێن گەلێ کورد خەونا وان بوویە ، نھا خەبات بو سەربەخویی و دەولەتبوونێ یە ، و بەرڤێ گنرگە و پێدڤی یە ئەم ھەموو پشتەڤانیا سەرۆکێ ھەرێما کوردستانێ مەسعود بارزانی بکەین و ئەڤی پرۆژەی ب سەربێخین ، داکو خوونا شەھیدان بەرئاڤێ دا نەچیت)
