جەماوەرێ دەڤەرا ئامێدیێ سەرەدانا مەزارێ نەمران ل بارزان كر
ئامێدیێ، مەحمود نهێلی:
ب سەرپەرشتیا لقێ 18 یێ پارتی دیموكراتی كوردستان، جەماوەرێ دەڤەرا ئامێدیێ دوهی 29/4/2024 سەرەدانا مەزارێ نەمران ل بارزان كر.
بەرەڤان حەمدی، بەرپرسێ لقێ 18 یێ پارتی د پەیڤەكێ دا دیار كر، بارزان هێمایێ شۆڕەش و بەرخودان و خوەراگریێ بوویە و گۆت: «هاتنا مە بۆ سەر مەزارێ نەمران دوپاتكرنا وەفاداری و دلسۆزیا مەیە بۆ رێبازا راستەقینەیا كوردایەتیێ و رێبازا بارزانیێ نەمر و پرەنسیپێن وێ، مینا: خودێ نیاسی، نیشتمان پەروەری، مرۆڤدوستی، بارزانیێ نەمر هەموو ژین و ژیارا خوە تەرخانكر بوو بۆ كوردستانێ».
گۆتژی: «ئەم وەكو موریدێن ڤێ رێبازێ سەربلندین، پشتی 100 سالان د ناڤ ڤان هەموو شۆڕەشێن ناڤخوەیی و جیهانی دا خوەدی رێبازەكا پاقژ و پیرۆزین و ئەو رێبازە پێكڤەژیانا مە د چارچوڤێ ئیراقەكا دیموكراسی دا تەئمین دكەت و مافی ددەتە خەلكێ كوردستانێ، كو ل پارچێن دی یێن كوردستانێ مومارسا مافێن خوەیێن یاسایی بكەن و ئەو رێبازە یا سەركردێن هەموو جیهانێ شاهدیێ بۆ پێكڤەژیانا ل كوردستانێ ددەن».
بەرپرسێ لقێ 18 گۆتژی: «ئەم یێن هاتین، داكو سۆز و پەیمانێن خوە نوو بكەینە ڤە و دێ درێژە پێدەرێن ڤێ رێبازا پیرۆز بین و دێ د خزمەتا كورد و كوردستانێ و خوینا شەهیدان و خەلكێ كوردستانێ دا بین».