حه‌شدا شه‌عبی: ئه‌مریكا دێ حه‌شدێ هه‌لوەشینیت
ئەڤرۆ نیوز ، زنار تۆڤی:
سه‌ركرده‌کێ عه‌سائیبی ئه‌هل حه‌ق ئه‌مریكا تۆمه‌تبار دکەت، ب فشار خستنێ ل سه‌ر به‌غدا بۆ هه‌لوه‌شاندنا حه‌شدا شه‌عبی و دوورخستنا ئه‌بو مه‌هدی موهه‌ندس ژ پۆستێ جێگرێ سه‌رۆكێ ده‌ستەیا حه‌شدا شه‌عبی.
له‌یس عه‌زاری سه‌ركرده د عه‌سائیبی ئه‌هلی حه‌ق دا بۆ پێگه‌هێ بەغداد ئەلیەوم گوتیە، کو ئه‌مریكیان گەلەک فشار ل سه‌ر حوکمه‌تا عێراقێ دروست كرینه، ژ پێخەمەت دوورخستنا ئه‌بو مه‌هدی موهه‌ندیس جێگرێ سه‌رۆكێ ده‌ستەیا حه‌شدا شه‌عبی و هه‌لوه‌شاندنا هێزێن حه‌شدا شه‌عبی، ئه‌ڤە د دەمەکێدایه کو ده‌سته‌یا حه‌شدا شه‌عبی و هێزان ب قانوونی و ژ لایێ پەرلەمانی ده‌نگ ل سه‌ر قانوونا وان دایه و هیچ كه‌س نەشێت قانوونان تێکدەت و ئەڤە بەرۆڤاژی کارێ پەرلەمانیە.
هەروەسا گوتیە، ئه‌و فشار و ده‌ستێوەردانێن راسته‌وخۆ یێن ئه‌مریکا د كاروبارێ نافخۆ یێ عیراقێ دێ كاریگه‌ریەکا نه‌رێنی ل سه‌ر پرۆسا سیاسی ل عێراقێ هەبیت، ئەڤ چەندە ژ لایێ حه‌شدا شه‌عبیڤه دهێته رەتکرن، چونكی ده‌سته‌یا حه‌شدا شه‌عبی و هەموو هێزێن وێ ئێک ژ دامه‌زراوێن فه‌رمی یێن ده‌وله‌تا عێراقێ نە، هه‌ر بزاڤەک بۆ نەهێلانا وێ دژایه‌تی كرنا كیان و سه‌روه‌ریا ده‌وله‌تا عیراقێ یە.
ئه‌بو مه‌هدی موهه‌ندس ئێكه ژ سه‌ركردێن حه‌شدا شه‌عبی و ژ لایێ ئه‌مریكاڤه وه‌ك ئێك ژ تیرۆریستێن داخوازکری دهێته هژمارتن ب تۆمه‌تا ته‌قاندنا باره‌گایێ بالیۆزخانا ئه‌مریكا ل كوێتێ ل سالا 1992،نوکە ژی جێگرێ سه‌رۆكێ ده‌سته‌یا گشتی یا حه‌شدا شه‌عبیه ل عیراقێ.
