حه‌فتيا بهێت رێكه‌فتن د ناڤبه‌را هه‌رێم و به‌غدا دا دێ هێته ئيمزا كرن
ئه‌ڤرۆ نيوز، نيوار محه‌مه‌د سه‌ليم:
بڕيارده‌رێ لژنا دارايى ل جڤاتا نوونه‌رێن عيراقێ راگه‌هاند كو ئه‌و رێكه‌فتنا ناڤبه‌را هه‌ولێر و به‌غدا هاتيه كرن، رێكه‌فتنه‌كا مه‌بده‌ئى يه، به‌لێ رۆژا ئێكشه‌مبى يا داهاتى رێكه‌فتن دێ هێته ئيمزا كرن و پاشان ژى ره‌شنڤيسێ بوودجا 2020ێ دێ بۆ جڤاتا نوونه‌ران هێته ره‌وانه‌كرن.
د. ئه‌حمه‌د سه‌فار، بڕيارده‌رێ لژنا دارايى ل جڤاتا نوونه‌رێن عيراقێ راگه‌هاند كو حوكمه‌تا هه‌رێما كوردستانێ ژ ده‌ستپێكا سالا داهاتى دێ رۆژانه 250 هزار به‌رميلێن په‌ترۆلێ د رێيا كۆمپانيا سۆمۆ را ره‌وانه كه‌ت، د به‌رامبه‌ر دا به‌غدا دێ بوودجێ هه‌رێما كوردستانێ ب ته‌مامى هنێريت، ديسا قه‌رێن ده‌رڤه، خه‌رجيێن حاكمى و مووچێ پێشمه‌رگه‌ى ژى دێ هنێريت.
ل دووڤ گۆتنێن بڕيارده‌رێ لژنا دارايى ل جڤاتا نوونه‌رێن عيراقێ ژ ئه‌گه‌رێ وێ چه‌ندێ كو سه‌رۆك وه‌زيرێن عيراقێ چو فراكسيۆن ل جڤاتا نوونه‌رێن عيراقێ نينن، ره‌نگه په‌سه‌ندكرن يا ب زه‌حمه‌ت بيت، ژ به‌ر هندێ پێدڤيه هه‌رێما كوردستانێ شانده‌كى بۆ دانوستاندنێ ل گه‌ل لايه‌نان پێك بينيت.
رۆژا دوشه‌مبى شاندێ هه‌رێما كوردستانێ سه‌ره‌دانا به‌غدا كربوو و ل گه‌ل لژنا دارايى و ئابوورى ل جڤاتا وه‌زيرێن عيراقێ كۆمبوو و پاشان ژى كۆمبوون ل گه‌ل وه‌زيرێ په‌ترۆلا عيراقێ كر و د داخۆيانيه‌كا رۆژنامه‌ڤانى دا راگه‌هاند كو رێكه‌فتنا ده‌ستپێكى د ناڤبه‌را هه‌ولێر و به‌غدا دا ل سه‌ر پرسا په‌ترۆلێ و بنه‌جهكرنا پشكا هه‌رێما كوردستانێ ژ بوودجه‌ى و ئاماده‌كرنا پرۆژێ قانوونا بوودجێ بۆ 2020ێ هاته ئه‌نجام دان.
