حه‌يده‌ر عه‌بادى ونێچيرڤان بارزانى كۆمبوون
ئه‌ڤرۆنيوز:
سه‌رۆك وه‌زيرێن عيراقێ ئه‌ڤرۆ دوشه‌مبى 30 تيرمه‌ها 2018 ل به‌غدا پێشوازى ل نێچيرڤان بارزانى سه‌رۆك وه‌زيرێن هه‌رێما كوردستانێ كر.
نڤيسينگه‌ها راگه‌هاندنێ يا سه‌رۆك وه‌زيرێن عيراقێ به‌لاڤكر”دكۆمبوونێ دا دانوستاندن ل دۆر ره‌وشا سياسى وگشتى ل عيراقێ وچه‌ندين باده‌كێن هه‌ڤپشك دناڤبه‌را حوكمه‌تا ناڤه‌ندى وحوكمه‌تا هه‌رێما كوردستانێ هاته كرن”.
نڤيسينگه‌ها ناڤبرى دياركر” دووپاتى ل سه‌ر گرنگيا په‌يوه‌نديێ ودانوستاندنێ ژبۆ چه‌سپاندنا كارێ نيشتمانيێ هه‌ڤپشك، پشتى بده‌ستڤه‌ئينانا سه‌ركه‌فتنێ ل سه‌ر تيرۆرستێن داعشێ وپێدڤيا هاريكاريێ دناڤبه‌را هێزێن ئه‌منى ب هه‌موو پێكهاتێن خوه‌ڤه وپێشمه‌رگه‌ى وگرنگيا پاراستنا وێ هه‌ڤكاريێ ژبۆ دووركرنا هه‌ر مه‌ترسيه‌كێ ل سه‌ر عيراقێ”.
ئاماژه دا ” بۆچوونێن نێزيك هه‌بوون ل هه‌مبه‌ر چاره‌سه‌ريا ته‌حه‌دياتان وپێدڤيا پێكئينانا حوكمه‌تا داهاتى ل عيراقێ ژبۆ بده‌ستڤه‌ئينانا داخوازيێن وه‌لاتيان دپشته‌ڤانيا ئابوورێ وئاڤه‌دانكرنێ وپێشكێشكرنا خزمه‌تگوزاريان وپه‌يداكرنا ده‌ليڤێن كارێ”.
