حوكمه‌تا ئیراقێ گه‌فێن بڕینا ئه‌رزاقێ هه‌یڤانه یێ ئاواره‌یان دكه‌ت
هه‌ولێر، قائید میرۆ:
حوكمه‌تا ئیراقێ گه‌فێن بڕینا ئه‌رزاقێ هه‌یڤانه یێ ئاواره‌یان دكه‌ت، هه‌كه‌ر بهێت و ڤه‌نه‌گه‌ڕنه ده‌ڤه‌رێن خوه و به‌رپرسه‌كێ حوكمه‌تا هه‌رێما كوردستانێ ژی دبێژیت: د ده‌مێ نوكه دا نێزیكی 665 هزار ئاوارێن ناڤخوه ل هه‌رێمێ ماینه.
حوسێن كه‌لاری، رێڤه‌به‌رێ گشتیێ ناڤه‌ندا هه‌ڤپشكا قه‌یرانان ل هه‌رێما كوردستانێ بۆ رۆژناما ئه‌ڤرۆ دیار كر، حوكمه‌تا ئیراقێ گه‌فێن بڕینا ئه‌رزاقی ل ئاواره‌یان كرینه، هه‌كه‌ر بهێت و ڤه‌نه‌گه‌ڕنه ده‌ڤه‌رێن خوه و گۆت: “ئه‌م وه‌كو حوكمه‌تا هه‌رێما كوردستانێ رازی نابین هیچ بڕیاره‌ك ب زۆری ل سه‌ر ئاواره‌یان بهێته سه‌پاندن و هه‌ر ئاواره‌یه‌كێ ب حه‌زا خوه ڤه‌نه‌گه‌ڕیت، هه‌رێما كوردستانێ یا به‌رهه‌ڤه بۆ مانا ئاواره‌یان هه‌تا ره‌وشا ده‌ڤه‌رێن وان ب ته‌مامی ئاسایی دبیت و مه‌ترسی ل سه‌ر ژیانا وان نه‌مینن”.
حوسێن كه‌لاری گۆتژی: “ل هه‌رێما كوردستانێ نێزیكی 665 هزار ئاواره‌یێن ناڤخوه‌یا ئیراقێ هه‌نه و 70%ێ ژ وان ئاواره‌یان ل ده‌رڤه‌ی كه‌مپانن و یێن دی ژی د ناڤا كه‌مپان دا ئاكنجینه، وه‌لاتیێن ئاواره، مینا: وه‌لاتیێن هه‌رێما كوردستانێ ل هه‌موو خزمه‌تگوزاریێن حوكمه‌تا هه‌رێما كوردستانێ مفادارن و وه‌كی هه‌ر خێزانه‌كا ئاسایی ژیانا خوه ده‌رباز دكه‌ن، ئه‌ڤه ژی سیاسه‌تا حوكمه‌تا هه‌رێما كوردستانێ یه ل دۆر خه‌لكێ ئاواره و ده‌ربه‌ده‌ر”.
