حوكمه‌تا سوريا گه‌فان ل ئۆپۆزسيۆنا وه‌لاتێ خوه دكهت
ئه‌ڤرۆ نيوز، فاتما مزوورى:
سوپایێ سوریا ئاماده‌كارى دررست كرينه ژبۆ ئه‌نجامدانا هێرشه‌ك له‌شكری يا به‌رفره‌هـ ژبۆ كنترۆلكرنا ده‌ڤه‌رێن باشوورێ رۆژئاڤایێ وی وه‌لاتی كو دبن كۆنترۆلا چه‌كدارێن ئۆپۆزسیۆنێ دانه.
ئه‌ڤ پێنگاڤا حوكمه‌تا سوریا دبيت كو ببيته سه‌ده‌ما زێده‌بوونا گرفتێن له‌شكری و فره‌هبوونا هه‌ڤركيان ل سوریا.
فه‌رمانداره‌كێ ناڤ وێ هه‌ڤپه‌یمانیا له‌شكری كو پشتگێریا حوكمه‌تا سوریا دكهت، دوهی ب ئاژانسا رۆیته‌رز راگه‌هاند، سوپایێ رژێما ئه‌سه‌د هه‌موو ئاماده‌كاریێن خوه ژبۆ ئه‌نجامدانا هێرشه‌كی كرنه و حوكمه‌تا سوریا نها يا ب هێزه و دشێت ب خوه هه‌موو هێرشێن له‌شكری ئه‌نجام بده‌ت.
هه‌مبه‌ر وێ فه‌رمانداره‌كێ چه‌كدارێن ئۆپۆزسیۆنێ ل ده‌رعا ب رۆیته‌رز راگه‌هاندیه كو چو ئاماژه‌یه‌ك ژبۆ ئاماده‌كاریا له‌شكری یا حوكمه‌تا سوریا ژبۆ ئه‌نجامدانا هێرشه‌كا ب ڤی ئاوای نینه و حوكمه‌تا سوریا تۆمه‌تبار كر ب برێڤه‌برنا شه‌ره‌كێ سایكۆلۆژی د ناڤ چه‌كدارێن ئۆپۆزسیۆنێ.
پشتی كۆنترۆل كرنا ده‌ڤه‌رێن ده‌رودۆرا دیمه‌شق و باكورێ باژارێ حومس ژ لايێ حوكمه‌تا سوریا ب پشتگێریا له‌شكری یا ئیران و رووسیا، حوكمه‌تا سوریا به‌حس ل كۆنترۆلكرنا ده‌ڤه‌رێن باشوورێ رۆژئاڤایێ سوریا كو دبن كۆنترۆلا چه‌كدارێن ئۆپۆزسیۆنێ دانه كر، حوكمه‌تا سوریا سۆز دا ته‌ڤایا سوریا بێخيته دبن ده‌ستێ خوه دا.
باشورێ رۆژئاڤایێ سوریا جهێ دلگرانیا ئه‌مه‌ریكا یه كو سالا بوری ب رێكه‌فتن ژ لايێ ئو‌رد‌ن و به‌شار ئه‌سه‌د ده‌ڤه‌رێن كێمكرنا ئالۆزیان و شه‌ر پێكئينابوو ئه‌ڤه ژی ب شێوه‌یه‌كی سه‌ره‌كی وان ده‌ڤه‌ران دگريت يێن كو نێزیكی سنورێ ئسرائیل.
شه‌مبیا بۆری ئه‌مریكا هشیاری دا حوكمه‌تا سوریا كو ئه‌گه‌ر هه‌ر بنپێكرنه‌كێ ئه‌نجام بده‌ت ل ده‌ڤه‌رێن ئاگربه‌ست، ئه‌مریكا دێ به‌رسڤه‌كا توند بده‌ت.