حوكمه‌تا هه‌رێما كوردستانێ نووچه‌كێ ل دۆر پاره‌يى ره‌ت دكه‌ت
ئه‌ڤرۆ نيوز:
ئاخفتنكه‌رێ ب ناڤێ حوكمه‌تا هه‌رێما كوردستانێ نووچه‌ك ره‌تكر كو دبێژيت: “ژ ئه‌گه‌رێن سياسى ل توركيا ده‌ست ب سه‌ر داهاتێ په‌ترۆلا هه‌رێما كوردستانێ دا هاتيه گرتن”.
سه‌فين دزه‌يى، ئاخفتنكه‌رێ ب ناڤێ حوكمه‌تا هه‌رێما كوردستانێ د داخۆيانيه‌كێ دا بۆ مالپه‌رێ حوكمه‌تا هه‌رێما كوردستانێ گۆت: “هنده‌ك ده‌زگه‌هێن راگه‌هاندنێ نه‌به‌رپرسيارانه نووچه‌كێ خه‌له‌ت به‌لاڤكريه كو ئاماژه ب وێ چه‌ندێ كريه كو ژ ئه‌گه‌رێن سياسى توركيا ده‌ست ب سه‌ر داهاتێ په‌ترۆلا هه‌رێما كوردستانێ دا گرتيه و رێگرى لێ كريه ب ڤه‌گه‌ريته هه‌رێما كوردستانێ.
ئاخفتنكه‌رێ ب ناڤێ حوكمه‌تا هه‌رێما كوردستانێ ئه‌و نووچه ره‌تكريه و دبێژيت: “ئه‌ڤ نووچه يێ دروست كريه و نه‌يێ راسته و ژ هه‌ر راستيه‌كێ يێ دووره و ژ ئه‌گه‌رێ كێشه‌كا ته‌كنيكى يا ناڤبه‌را به‌نكا هنارتن و وه‌رگرتنێ بۆ چه‌ند رۆژه‌كان پرۆسه‌يا ڤه‌گوهاستنا پاره‌ى گيرۆ بوويه، به‌لێ ل دووماهيێ كێشه چاره بوويه و نوكه پرۆسه‌يا ڤه‌گوهاستنا پارێ په‌ترۆلێ د ناڤبه‌را هه‌ردو به‌نكان دا ب ره‌نگه‌كێ رێك و پێك ب رێڤه دچيت.
