حوكمه‌تا هه‌رێما كوردستانێ په‌يامه‌كێ به‌لاڤ دكه‌ت
ئه‌ڤرۆنيوز:
به‌رى ده‌مه‌كێ كێم حوكمه‌تا هه‌رێما كوردستانێ په‌يامه‌ك ل دۆر ره‌وشا فه‌رمانبه‌رێن هه‌رێما كوردستانێ به‌لاڤكر.
د وێ په‌يامێ دا هاتيه” حوكمه‌تا هه‌رێما كوردستانێ ره‌وشا زه‌حمه‌ت يا مووچه‌خۆرێن هه‌رێمێ تێدگه‌هيت وسوپاسيا خوراگرى ودان ب خوه‌داگرتنا وان دكه‌ين، زێده‌بارى ره‌وشا ب زه‌حمه‌ت، ل قانوونا بودجا عيراقا فيدرالى ژى دا سته‌م ل هه‌رێما كوردستانێ هاته كرن، پشكا بودجه‌ى وماف وشايستێن دارايى هاتنه كێمكرن، به‌لێ ژئه‌نجامێ دانوستاندنێن هه‌ولێر – به‌غدا، ل سه‌ر بريارا حه‌يده‌ر عه‌بادى سه‌رۆك وه‌زيرێن عيراقا فيدرال، كوژمه‌گێ پاره‌ى (هه‌رچه‌نده يێ كێم بوو) گه‌هشته هه‌رێما كوردستانێ”.
حوكمه‌تا هه‌رێمێ دپه‌ياما خوه‌دا دبێژيت، به‌رى جه‌ژنا نه‌ورۆزێ مه بريار دابوو كۆمبوونه‌كا تايبه‌ت ل سه‌ر پاشكه‌فتكرنا مووچه‌ى بهێته ئه‌نجامدان، ئه‌ڤرۆ 25/3/2018 ب به‌رهه‌ڤبوونا سه‌رۆك وجێگرێ سه‌رۆك وه‌زيرێن هه‌رێما كوردستانێ ووه‌زيرێن ساخله‌ميێ وپه‌روه‌ردێ ووه‌زيرێن په‌يوه‌نديدار، كۆمبوونه‌ك هاته ئه‌نجامدان وتێدا ئه‌ڤ خالێن ل خوارێ هاتنه په‌سه‌ندكرن:
- هه‌كه به‌غدا هه‌يڤانه يا به‌رده‌وامبيت ل سه‌ر هنارتنا وى كوژمێ پاره‌ى كو 317 مليار و540 مليۆن دينارن كو كوژمه‌كێ كێم يێ پاره‌يه، حوكمه‌تا هه‌رێما كوردستانێ ل گه‌ل داهاتێپه‌ترۆلێ وداهاتێ ناڤخوه‌يێ هه‌رێما كوردستانێ، دێ ده‌ستكاريێ دپاشكه‌فتكرنا مووچه‌ى دا كه‌ت ب جۆره‌كى كو دبه‌رژه‌وه‌نديا مووچه‌خۆرێن هه‌رێما كوردستانێ دابيت.
- وه‌زاره‌تا دارايى وئابوورى هاتيه راسپاردن ل رۆژێن بهێت ل دووڤ داهاتى خشتێ نوو يێ مووچه‌ى به‌رهه‌ڤ بكه‌ت بۆ وێ چه‌ندێ دكۆمبوونا ڤێ حه‌فتيێ يا جڤاتا وه‌زيران دا بريارا دووماهيێ ل سه‌ر بهێته دان تاكو مووچێ بهێت ب وى خشتێ نوو بهێته به‌لاڤكرن.
- حوكمه‌تا هه‌رێما كوردستانێ ل رۆژێن بهێت هه‌موو داهاتێن ناڤخوه وپه‌ترۆلێ وكوژمێ پاره‌يێ ژبه‌غدا دهێت ل گه‌ل هاريكاريێن ئه‌مريكا بۆ پێشمه‌رگه‌ى وچاوانيا خه‌رجكرنێ دێ به‌رچاڤ كه‌ت.
