حوكمه‌ت نووترين پێزانينان ل دۆر مووچێ فه‌رمانبه‌ران ئاشكرا دكه‌ت
ئه‌ڤرۆنيوز:
حوكمه‌تا هه‌رێما كوردستانێ رادگه‌هينيت، ب رێيا پرۆژه‌كێ چاكسازيێ دێ بزاڤێ كه‌ن مووچێ هه‌يڤانه‌يێ فه‌رمانبه‌ران دده‌مێ خوه دا به‌لاڤ بكه‌ن.
سه‌فين دزه‌يى په‌يڤدارێ حوكمه‌تا هه‌ريما كوردستانێ، ئه‌ڤرۆ دوشه‌مبى 25/12/2017 دچارچۆڤێ ب رێڤه‌چوونا ري وره‌سمێن جه‌ژنا كريستيانان ل هه‌ولێرێ دداخۆيانيه‌كا رۆژنامه‌ڤانيدا گۆت” حوكمه‌تا هه‌رێمێ ب رێيا پرۆژه قانوونه‌كا چاكسازيێ وپاكسازيێ دسيسته‌مێ مووچه‌ى دا كو ژلايێ جڤاتا وه‌زيران ڤه هاتيه په‌سه‌ندكرن وهنارتن بۆ په‌رله‌مانى وهه‌موو بزاڤێن خوه دێ كه‌ت كو ل سالا داهاتى مووچه ل ژڤانێ خوه بهيته به‌لاڤكرن”.
په‌يڤدارێ حوكمه‌تێ گۆت ژى” حوكمه‌تا هه‌رێمێ ب رێيا وه‌زاره‌تا دارايى ڤه پێداچوونێ دئابوورێ هه‌رێما كوردستانێ دا دكه‌ت وبزاڤێ دكه‌ت ب شێوه‌كێ سه‌رده‌ميانه و ب رێيا سيسته‌مێ بايۆمه‌ترى موچه‌ى به‌لاڤ بكه‌ت، بۆ ئه‌نجامدانا ڤێ چه‌ندێ ژى پێدڤى ب گوهۆرينا هنده‌ك رينما قانوونان هه‌يه، ڤێ پێنگاڤه ژى پێدڤى ب هاريكاريا په‌رله‌مانى وپشته‌ڤانيا هێزێن سياسى يا هه‌ى”.
ئاماژه كر” هه‌رێم چاڤه‌رێ ده‌ستپێكرنا دانوستاندنايه ل گه‌ل به‌غدا، نوكه چاڤه‌رێى ده‌ستپێشخه‌ريه‌كا سه‌رۆك كۆمار ونه‌ته‌وێن ئێكگرتى دكه‌ين بۆ وێ چه‌ندێ هه‌ر چ نه‌بيت ئه‌و كێشێن پێدڤى ب چاره‌سه‌ريا بله‌ز هه‌ين زوو دانوستاندن ل سه‌ر بهێته كرن”.
گۆت ژى” حوكمه‌تا هه‌رێمێ به‌رهه‌ڤيا خوه يا نيشانداى كو هه‌موو ده‌رگه‌هين سنورى وفرۆكخانه ب هه‌ڤپشكى ل گه‌ل به‌غدا ب رێڤه ببه‌ت”.
