حوكمەتا هەرێما كوردستانێ دوپاتیێ ل سەر رۆلێ سەرەكیێ خوە د پڕۆژەیێ رێكا گەشەپێدانێ دا دكەت
شاندێ حوكمەتا هەرێما كوردستانێ ل بەغدا، پڕۆژەیێ (رێكا گەشەپێدانی) ل گەل بەرپرسێن حوكمەتا ئیراقێ گەنگەشكر.
دوهی چارشەمبی 27/8/2025، شاندەكێ بلند یێ حوكمەتا هەرێما كوردستانێ، ب سەرۆكایەتییا ئانۆ جەوهەر، وەزیرێ ڤەگوهاستن و گەهاندنێ، ب مەرەما گەنگەشەكرنا پڕۆژەیێ ستراتیژی (رێكا گەشەپێدانی) ل گەل بەرپرسێن حوكمەتا ئیراقێ، گەهشتە بەغدا.
شاندێ حوكمەتا هەرێما كوردستانێ ل گەل محەمەد عەلی تەمیم، جێگرێ سەرۆك وەزیرێن ئیراقێ و وەزیرێ پلاندانانێ ورەزاق سەعداوی، وەزیرێ ڤەگوهاستنێ و هەژمارەكا بەرپرسێن پەیوەندیدارێن حوكمەتا ئیراقێ كۆمبوو.
ئانۆ جەوهەر، وەزیرێ ڤەگوهاستن و گەهاندنێ ل هەرێما كوردستانێ د داخۆیانییەكا رۆژنامەڤانیدا راگەهاند كۆمبوونا مە یا ئەرێنی بوو، هەروەسا گوت» د كۆمبووناندا ل سەر راسپاردەیا مەسرور بارزانی، سەرۆكێ حوكمەتا هەرێما كوردستانێ، دوپاتی ل سەر بۆچوونا فەرمی یا حوكمەتا هەرێما كوردستانێ سەبارەت ب پڕۆژەیێ ستراتیژیێ (رێكا گەشەپێدانێ) هاتە كرن».
وەزیرێ ڤەگوهاستن و گەهاندنێ ئاماژە ب وێ چەندێ ژی كر» شاندێ هەرێمێ رۆهنكر كو ژ روویێ تەكنیكیڤە، رێكا هەرێما كوردستانێ بۆ رۆژهەلاتا رووبارێ دیجلە، رێكەكا كورتترە و تێچوویێ وێ ژی كێمترە، هەروەسا ژ روویێ ئاسایشێڤە یا پاراستیترە هەمبەركرن ل گەل وێ رێكا بیابانی كو ئالیێن دی پێشنیاز كری و دخوزان ب رۆژئاڤایێ رووبارێ دیجلەدا بچیت».
ئانۆ جەوهەر باس ل وێ چەندێ ژی كر» رێككەفتین ل سەر وێ چەندێ راپۆرتەكا هوور و پڕی پێزانین پێشكێشی لیژنەیا بەغدایێ بكەین، كو تێدا ئالیێن ئەرێنی یێن دەربازبوونا پڕۆژەیێ ب هەرێما كوردستانێ را و ب تایبەتی ناحیا رزگاری سەر ب ئیدارەیا سەربخوەیا زاخۆ و ژ وێرێ بەر ب توركیا، ب هووری دێ هێنە بەرچاڤكرن، هەروەسا داخواز ژلژنەیێ هاتیە كرن سەرەدانا جهێ پێشنیازكری بكەت».
وەزیرێ ڤەگوهاستن و گەهاندنێ دوپاتی ل وێ چەندێ كر» نابیت پڕۆژەیێ (رێكا گەشەپێدانێ) بێی هەرێما كوردستانێ بهێتە بجهئینان، چونكە هەكە ب هەرێمێ را دەرباز نەبیت، هیچ رێكەكا دی نابیت بگەهیتە توركیا».
هەروەسا رۆهنكر» ئەم دخوازین ل شوونا 10 یان 12 كیلۆمەتران ب كوردستانێ دەرباز بیت، د دەشتا نەینەوا را دەرباز ببیت و ئەو پێكهاتەیێن جۆرا و جۆرێن كو ل بن دەستێ داعشێ نەهامەتییەكا مەزن ل وێ دەڤەرێ دیتی، مفادار بن ژ پڕۆژەیێ ناڤبری و پاشی بهێتە سێمێلێ و دهۆكێ و بەر ب زاخۆ بچیت».
ل دۆر پڕۆژەیێ شەمەندەفەرێ ژی، ئانۆ جەوهەری ئاشكراكر كو ل گەل وەزارەتا ئاڤەدانكرن و ئاكنیجیكرنێ ب هەماهەنگی كاری ل سەر دكەن و كۆمپانییەكا ئیسپانی دیزاین بۆ دانایە. هەر دەمەكی رەوشا دارایی یا گونجای بیت، راستەوخوە دێ دەست بجهئینانێ هێتە كرن، ئەڤجا چ ب رێكا وەبەرئێنانێ بیت یان بجهئینانا راستەوخوە.
