حوكمەتا هەرێما كوردستانێ یا بەردەوامە ل پشتەڤانیكرنا خەلكێ نەینەوا د هەموو بیاڤان دا
دیدار/ دلۆڤان ئاكرەیی
ئەندامەكێ جڤاتا نوونەرێن ئیراقێ ژ فراكسیۆنا پارتی دیموكراتی كوردستان بەرسڤا داخۆیانیێن یوسف سورانی دا و دبێژیت، داخۆیانییێن وی راستیێ دەرنابڕن و یوسف سوران بتنێ نوونەراتییا خوە دكەت، و شەرعییەتا مادەیا 140 ژ دەستوورێ ئیراقێ ژی پشتڕاست كر.
وەك بەرسڤەك بۆ داخۆیانیێن ڤێ دوماهیێ یێن یوسف سوران، ئەندامێ جڤاتا پارێزگەها نەینەوا ل دۆر ئاخڤتنا ب ناڤێ پێكهاتەیێن كریستیان و ئێزدی ل پارێزگەها نەینەوا، شێروان دوبەردانی، ئەندامێ جڤاتا نوونەرێن ئیراقێ ژ فراكسیونا پارتی دیموكراتی كوردستان بۆ رۆژنامەیا (ئەڤرۆ) گوت»ئەڤ داخۆیانییە راستیێ دەرنابڕن و یوسف سوران ب تنێ نوینەراتییا خوە دكەت و چ شەرعییەت و دەستهەلات ژ ئالیێ خەلكێ كریستیان و ئێزدی ل نەینەوا ڤە نینە كو ب ناڤێ وان باخڤیت و خەلكێ پارێزگەهێ باش دزانن كی نوینەراتی و پشتەڤانییا وان دكەت و بزاڤێن هندەك كەسان بۆ بكارئینانا هەلبژارتنان بۆ بەلاڤكرنا فیتنە و ئاریشەیان جهێ رەتكرنێ نە و مادەیا140 ژ دەستوورێ ئیراقێ مادەیەكا دەستووری یا پشتراستكریە و هەموو پێرابوونێن پێڤە گرێدای ب بەردەوامی د كاردانە و نڤیسینگەها مادەیا 140 ل باژێرێ مووسلێ رۆژانە دەرگەهێن خوە بۆ پێشوازیكرنا خەلكێ دەڤەرێن ڤێ مادەیێ ڤەدكەت، دا داخوازیێن خوە پێشكێش بكەن و ل دوووڤ قانوونێ بهێنە قەرەبووكرن چونكە ئەڤ مادەیە خودان شەرعییەتەكا تەمامە و ب شێوەیەكێ چالاك و بەردەوام كار دكەت ژبۆ بجهئینانا دادپەروەریێ بۆ خەلكێ دەڤەرێن كێشە ل سەر»
دەربارەی سەرەدانا وەزیرێ ناڤخوەیێ هەرێما كوردستانێ بۆ مووسلێ، دوبەردانی دیار كر» ئەڤ سەرەدانە ل سەر ڤەخواندنەكا فەرمی و ب هەماهەنگییەكا تەمام د ناڤبەرا حوكمەتا هەرێمێ و ئیدارەیا پارێزگەها نەینەوا دا بوویە و دێ حوكمەتا هەرێمێ یا بەردەوام بیت ل سەر پشتەڤانیكرنا خەلكێ نەینەوا، ب تایبەتی د دەمێ قەیرانێن ئاوارەییێ و رەوشێن مرۆڤی یێن دژوار دا و وەزیرێ ناڤخوەیا هەرێمێ د ئاخڤتنا خوە دا تەكەز ل سەر گرنگییا بجهئینانا رێككەفتنا بەغدا – هەولێر یا تایبەت ب ئاساییكرنا رەوشا قەزا شنگالێ كر و زڤڕینا خەلكێ وێ ب سلامەتی و ب بێ دودلی بۆ سەر وارێن خوە و چولكرنا كەمپێن ئاوارەییێ نە ل دووڤ خاستا وان».
هەروەسا، دوبەردانی تەكەز كر كو هەر بزاڤەك بۆ بكارئینانا پرۆسەیا هەلبژارتنان بۆ بەلاڤكرنا ناكۆكیێن تائیفی یان سیاسی د ناڤبەرا خەلكێ نەینەوا دا، بزاڤێن رەتكری نە و ئەو دێ مینیت پشتەڤانێ سەرەكی بۆ هەموو خەلكێ پارێزگەهێ بێی جوداهی، هەرچەند هندەك ئالی بزاڤا ئاڤاكرنا فیتنە و ناكۆكییان بدەن و ئێكگرتن و هەڤكاری د ناڤبەرا هەموو پێكهاتەیێن نەینەوا دا ئێكانە رێكە بۆ بجهئینانا ئارامی و ئاڤەدانیێ و حوكمەتا هەرێما كوردستانێ دێ یا بەردەوام بیت ل سەر پشتەڤانیكرنا خەلكێ نەینەوا د هەموو بیاڤان دا.
