حوكمەتا هەرێمێ هەموو بزاڤان دكەت ئاریشەیان ل گەل بەغدا چارەسەر بكەت
ئەندامەكێ جڤاتا نوونەرێن ئیراقێ ژ سەر فراكسیۆنا پارتی دیموكراتی كوردستان، ڕاگەهاند: حوكمەتا هەرێما كوردستانێ بۆ ب دەستڤەئینانا هەموو مافێن خوە یێن دەستووری و قانوونی یێن خەلكێ هەرێما كوردستانێ، ب ڕەنگەكێ بەردەوام كار دكەت، بەلێ هەردەم ئاستەنگ ژ ئالیێ لایەنێن ئیراقێ ڤە دهێنە دروستكرن، ڤێ چەندێ وەكرییە كو هەرێما كوردستانێ بكەڤیتە ڤێ ڕەوشا نوكە و دیسان گیروكرنا مووچەیێن فەرمانبەرێن هەرێمێ یا بەردەوام بیت، هەر چەندە حوكمەت كار دكەت بۆ وێ چەندێ كو قەیرانا دارایی بهێتە چارەسەر كرن، یاكو ژ ئالیێ حوكمەتا ئیراقێ ڤە هاتییە دروستكرن و ڤێ مەهێ حوكمەتا هەرێما كوردستانێ دێ سولفا خوە یا دوماهییێ ژ حوكمەتا ئیراقێ وەرگریت و وەزیرا دارایی یا ئیراقێ ئاریشەیان دروست دكەت و یا هاریكار نینە بۆ هنارتنا مووچەیێ فەرمانبەرێن هەرێما كوردستانێ.
سیپان شێروانی، ئەندامێ جڤاتا نوونەرێن ئیراقێ ژ لیستا پارتی دیموكراتی كوردستان زێدەتر بۆ ڕۆژنامەیا (ئەڤرۆ) ئاشكرا كر»چەندین جاران ڕێككەفتن د ناڤبەرا حوكمەتا هەرێما كوردستانێ و حوكمەتا ئیراقێ دا هاتینە كرن، بەلێ هەردەم ئیراقێ ئاستەنگ دروست كرینە و خواندنێن جۆدا بۆ بڕگەیێن وان ڕێككەفتنان و بودجەیا هەرێمێ كرینە، لەوما هەتا نوكە ئەڤ ڕەوشا ل هەرێما كوردستانێ هەی، یان ژی گیروبوونا مووچەیێن فەرمانبەران یا بەردەوامە، هەر چەندە شاندێ حوكمەتا هەرێما كوردستانێ چەندین جاران سەرەدانا بەغدا كرییە و كۆمەكا بابەتان باس كرینە و ئەڤێ جارێ بابەتێ ژ هەموویان گرنگتر، مووچەیێن ئەوان سێ مەهانە یێن كو هەتا نوكە حوكمەتا ئیراقێ نە هنارتین».
گۆت ژی» د قانوونا بودجەی دا ئەوا ئالیێن ئیراقی ب خوە پەسەند كری، دڤێت حوكمەتا ئیراقێ كاری ب وێ نڤیسارێ بكەت كو مەهانە 775 ملیار دیناران بۆ مووچەیێن فەرمانبەرێن هەرێمێ بهنێریت، لەوما نابیت مووچەیێن ئەوان سێ مەهێن ماین ب مینیت، دڤێت حوكمەتا ئیراقێ وی پارەیی بۆ مووچەێن فەرمانبەران ب هنێریت، ئەو ئاریشەیێن ئەڤرۆ حوكمەتا ئیراقێ بۆ مە دروست دكەت، جڤاتا نوونەرێن ئیراقێ ئەڤ چەندە چێكرییە و ئالییێن شیعی ڤێ چەندێ دروست دكەن، هەروەسا ئەو ئاریشەیێن حوكمەتا ئیراقێ بۆ حوكمەتا هەرێما كوردستانێ دروست دكەت، ئەگەرێ وێ هەموویێ جڤاتا نوونەرێن ئیراقێ یە، لەوما نابیت ئەڤ ڕەوشە یا بەردەوام بیت، چونكە ئالیێن ئیراقێ هەموو قانوون و دەستوور یێن پێشێلكرین و دڤێت سنۆرەك بۆ ئەڤێ چەندێ بهێتە دانان و دیسان ڕەوشا ئیراقێ ب خوە ژی یا باش نینە و نابیت دەستوور بهێتە تێكدان، بۆ ئەڤێ قووناغێ ژی دڤێت بابەتێ مووچەیان بهێتە چارەسەر كرن و دیسان ڕوونشتنەكا تایبەت بهێتە كرن و پڕۆژە قانوونا بودجەیا گشتی یا ئیراقێ بهێتە جڤاتا نوونەران و پاشی بهێتە ڕاستڤەكرن».
