حوکمەتا ئوکرانیا رەوشا نەئاسایی ل وەلاتی راگەھاند
ئەڤرۆ:
پشتی ئاشکرابوونا ئەنجامێ ھەلبژارتنێن ھەرێما دونتیسک یا رۆژھەلاتێ ئوکرانیا کو تێدا پرانیا خەلکێ پشتەڤانیا خوە بۆ جودابوونا ژ ئوکرانیا دیار کرینە حوکمەتا وی وەلاتی بریار دا کو رەوشا نەئاسایی بھێنە راگەھاندن و نھا جڤاتا ئێنماھیا ئوکرانیا بەرھەڤیێ بۆ کۆمبوونەکا مەزن دکەت و دھێتە چاڤەرێ کرن کو ئەڤرۆکە ھندەک بریار سەبارەت ب پاشەرۆژا ئوکرانیا و ھەرێما دونتیسک بھێنە دەرکرن.
ل ئالیێ دی ئاژانسا فرانس پرێس ژی د راپۆرتەکێ دا راگەھاند کو ئەنجامێ ھەلبژارتنان کو ٨٠% خەلکێ دەنگ داینە وان ئالیان کو داخوازا جودابوونێ ژ ئوکرانیا دکەن و ئەڤە ژی ب تەمامی دژێ وێ رێککەڤتنێ یە کو بەریا نھا د ناڤبەرا ھەر دو ئالیان دا ھاتبوو ئیمزاکرن و ل گۆر وێ رێککەڤتنێ ژی پەرلەمانێ ئوکرانیا ھەرێمەکا ئۆتۆنۆمی ل رۆژھەلاتێ وەلاتی قەبوول کربوو لێ ئەنجامێ ھەلبژارتنان مەترسیەکا پارچەبوونا ئوکرانیا نیشا ددەت و روسیا ژی ب تەمامی پشتەڤانیا وێ یەکێ دکەت.
ل ئالیێ دی وەزارەتا دەرڤە یا ئەمریکا جارەکا دی دیار کر کو ئەو ب چو رەنگەکێ ئەنجامێ ھەلبژارتنێن ھەرێما دونتیسک قەبوول ناکەن، چونکو ئەو ھەلبژارتن ل سەر بنەمایێ ئیرادا خەلکێ وێ ھەرێمێ نەھاتینە کرن و ل ژێر گەفێن روسیا ھاتینە کرن و ژ بەر وێ یەکێ ژی ئەو دانپێدانێ ب ئەنجامێ وان ھەلبژارتنان ناکەن، پرانیا وەلاتێن ئورۆپا و نەتەوێن ھەڤگرتی ژی بەریا نھا ب رەنگەکێ فەرمی دیار کربوون کو ئەو ئەنجامێ وان ھەلبژارتنان قەبوول ناکەن.