حوکمەتا عیراقێ: د ڤى حاله‌تى دا سكرێ مووسل دێ په‌قيت
ئەڤرۆ نيوز:
حوکمەتا عیراقێ د بەیاننامەکێ دا ئاشکرا کر کو سکرێ مووسل دێ ژ 319 مەترێن بلنداھیا ئاستێ ئاڤێ ھەرفیت، نوکە ژی 307 مەترێن ئاڤێ د ناڤ سکرێ ناڤبری دا ھەنە ئەڤە ژی وێ چەندێ دیار دکەت کو مەترسیەکا مەزن یا ل سەر سکری ھەی.
ب ڤێ مەرەمێ حوکمەتا ھەرێما کوردستانێ ژی دوھی رۆژا 28/2/2016 د بەیاننامەکێ دا دیار کر کو بەری دەست پێ کرنا پرۆسا ئازادکرنا مووسل دێ بزاڤان بۆ چارەکرنا وان مەترسیێن ل سەر سکرێ مووسل کەن، چونکی چارەکرنا سکرێ مووسل کارەکێ گرنگە و ئەگەرێ ھەرفینا سکری گەلەکا کێمە، بەلێ ھەر چەوا بیت پێدڤیە ئامادەکاری بۆ چارەکرنا وی بھێنەکرن.
حوکمەتا عیراقێ د بەیانناما خوە ئاماژە دا یە وێ چەندێ کو پێدڤیە ئەو وەلاتیێن نێزیکی رووبارێ دیجلە ئاگەھداری مەترسیێن شەپۆلێن ئاڤێ بن، چونکی رەنگە کارتێکرنەکا خراب ل سەر ئاکنجیێن دەڤەرێ ھەبیت ژبەر ڤێ چەندێ باشترین خوە پاراستن ئەوە کو خەلک بەرەب دەڤەرێن بلند بچن.
ھەژی گۆتنێ یە کو سکرێ مووسل ب مەزنترین سکرێ عیراقێ دھێتە ھژمارتن، بەلێ ل سالا 2014 ژبەر ھێرشێت تیرۆرستێن داعش کارێ نووژەنکرنا وێ بۆ دەمەکی ھاتە راوەستاندن کو پێدڤیە بەردەوام بھێتە نووژەنکرن ژبەر ڤێ چەندێ مەترسی یا ھەرفینێ ل سەر پەیدابوویە.
