حوکمەتا عیراقێ پارێ گەنمێ جۆتیاران دێ ژ پێش قەڕێن خوە ڤە بڕیت
ئەڤرۆ نیوز:
ئەنداما لژنا ئابووری و وەبەرئینانی ل جڤاتا نوونەرێن عیراقی بۆ ئەڤرۆ ئاشکرا کر کو دوھی 22/2/2016 د گەل وەزیرێ بازرگانیا عیراقێ پێشنیاز ھاتە کرن کو ھەر جۆتیارەکێ بۆ مەرەمێن چاندنی پارە ب قەڕ ژ حوکمەتی وەرگرت بن حوکمەت پارێ گەنمی ژ پێش وان قەرزان ڤە ژێ ببریت و گۆت: “رازەمەندی بۆ مەزاختنا 50 ملیار دینارێن پارێ گەنمێ جۆتیاران ھاتە کرن و رێژەکا وی پارەی دێ جۆتیارێن ھەرێمێ بیت”.
نەجیبە نەجیب، ئەنداما لژنا ئابووری وەبەرئینانێ ل جڤاتا نوونەرێن عێراقی ئاشکرا کر کو پشتی گەلەک دانوستاندن بۆ چارەکرنا ئاریشا پارێ گەنمێ جوتیاران یێن سالا 2014 و سالا 2015 د گەل وەزیرێ بازرگانیا عیراقێ ھاتینەکرن ئەو گەھشتنە وێ رێککەفتنێ کو حوکمەت ب کۆژمێ 924 ملیار دیناران بۆ پارێ گەنمێ جۆتیاران یێ سالا 2014 دابین بکەت و گۆت: “بۆ سالا 2015 حوکمەت دێ ب کۆژمێ تریلیونەک و 407 ملیار دیناران قەڕدارا جۆتیاران بیت، چونکی نوکە ب کۆژمێ دو ترلیۆن و 300 ملیار دیناران حوکمەت قەردارا جۆتیارێن ھەرێما کوردستانێ و عیراقێ یە”.
ناڤھاتیێ ئاشکرا کر کو دو پێشنیار ھاتینەکرن یا ئێکێ، ل شوونا حوکمەت قەڕێن چاندنێ ژ جۆتیاران وەرگریت نوکە پارێ گەنمێ جۆتیاران ژ پێش قەرزین چاندنی نەھێتەدان و پێشنیارا دویێ، شوونا حوکمەت یا قەرداری جۆتیاران بیت بلا پارەی ب قەڕ ژ بانکێن ئەھلی وەرگریت پارێ گەنمێ جۆتیاران پێ بدەت، چونکی ھەکە پارە د دەستێ جۆتیاران دا نەبیت رەنگە نەشێن بەردەوامی یێ ب کارێن خوە یێن چاندنێ بدەن و گۆت: “وەزیرێ بازرگانیا عیراقێ راگەھاند کو موازنا عیراقێ رێ یێ ب وان د دەت کو پارەی قەڕ بکەن داکو پارێ گەنمێ جۆتیاران بدەن ژبەر ڤێ چەندێ گەلەک فشار ل سەر وەزیری ھاتە کرن بۆ دابینکرنا پارێ گەنمێ جۆتیاران و چەندین پێشنیار ھاتنەکرن داکو وەزیر وان پێشنیاران بۆ ب دەستڤە ئینانا پارێ جۆتیاران شلۆڤە بکەت، چونکی نوکە نێزیکی 800 ملیار دینارێن جۆتیارێن ھەرێما کوردستانێ ل بەغدا ماینە”.
