حوکمەتێ بڕیارەک ل دۆر داھاتێ وەزارەتا ساخلەمیێ دەرکر

ئەڤرۆ نيوز:
بەرپرسەکێ وەزارەتا ساخلەمیا حوکمەتا ھەرێما کوردستانێ ئاشکرا کر کو حوکمەتا ھەرێمێ بڕیارا دای ژ رۆژا 1-6-2017ێ 30% ژ داھاتێ وەزارەتا ساخلەمیێ بۆ وێ ب خوە بھێتە مەزاختن.
د. خالس قادر، پەیڤدارێ رێڤەبەرێ گشتی یێ دیوانا وەزارەتا ساخلەمیێ ئاشکرا کر کو ب مەرەما گرنگیدان ب کەرتێ ساخلەمیێ جڤاتا وەزیران رازەمەندی ل سەر داخوازا وان دیار کر و بڕیار دا ژ رۆژا 1-6-2017ێ 30% ژ داھاتێ وەزارەتا ساخلەمیێ بۆ وێ ب خوە بھێتە مەزاختن و بۆ دوارۆژ گۆت: “ژ وێ رێژا ھاتیە دیارکرن 15% بۆ پشکێن خۆپاراستن و چاڤدێریا ساخلەمیێ یە و 15% ژی دێ بۆ نەخۆشخانان ھێتە مەزاختن”.
ناڤھاتی ئاماژە دا وێ چەندێ کو ل سالا 2016ێ مەزاختیێن وەزارەتا ساخلەمیا حوکمەتا ھەرێما کوردستانێ 762 ملیار و 849 ملیۆن دینار بوون، بەلێ بۆ سالا 2017ێ وەزارەتا ناڤھاتی داخوا ترلیۆنەک و 139 ملیار و 970 ملیۆن دیناران یا کری.

کۆمێنتا تە