حوکمەتێ ژڤانێ بەلاڤکرنا پارچێن ئەردی ئاشکەرا کر

ئەڤرۆ نیوز:

ئەندامەکێ لیژنا باژێڕڤانیان ل پەرلەمانێ کوردستانێ راگەھاند، حوکمەت مژوولی کۆمکرنا ناڤێن وان کەسانە یێن ھەتا نوکە مفادار نەبووین ژ وەرگرتنا پارچێن ئەردی و پیڤەر دێ بۆ بەلافکرنا ئەردێ ئاکنجیبوونێ ھەبن و گۆت: بەلاڤکرنا ئەردی دێ کەڤیتە سالا داھاتی و ھەر کەسەکێ گازندە ژی ھەبن دشێت پەیوەندیێ ب لیژنا باژێڕڤانیان بکەت.
بەھزاد زێباری، ئەندامێ لیژنا باژێڕڤانیێ ل پەرلەمانێ کوردستانێ بۆ رۆژناما ئەڤرۆ گۆت “ل گۆرەی فەرمانەکێ کو ل سالا 2006 سەرۆکایەتیا جڤاتا وەزیران دەرکریە، بەلاڤکرنا ئەردی ب سەر تەخ و چینێن جودا جودا دا ھاتیە راگرتن، بەلێ پشتی دەرکرنا فەرمانا راگرتنا ئەردی ب گەلەک رێیا ئەرد ھاتیە بەلافکرن، نوکە حوکمەتێ دووبارە بڕیار دایە پارچێن ئەردی ب سەر وەلاتی و فەرمانبەران بھێنە بەلافکرن، ل گۆرەی زانیاریێن مە ل وەزیر باژێڕڤانی و گەشت و گوزار نوکە لیژنەیەک پێکھاتیە بۆ خوە بەرھەڤکرنێ ھەتا ئەرد بھێتە بەلافکرن.
زێباری زێدەتر گۆت: ب دیتنا من پێدڤی ب سێ ھەیڤان ھەیە ھەتا زانیاری بھێنە کۆمکرن و ئامارەکا دروست بھێتە بەرھەڤکرن ل دۆر ڤان کەسێن مفادار نەبووین ژ وەرگرتنا پارچێن ئەردی، لیژنەیەک یا ئامارا کرێدار و کەسێن مفادار نەبووین کۆم دکەت، پشتی کۆمکرنێ دێ ناڤ ھێنە بلندکرن بۆ سەرۆکایەتیا جڤاتا وەزیران، بۆ ڤێ مەرەمێ دو خال زۆر دگرنگن، یا ئێکێ ئایا چەند کەس ھەنە مفادار نەبووین، یا دویێ ھەبوونا ئەردێ بەرھەڤ بۆ بەلافکرنێ، چونکو پێدڤیە ئەرد ھەبیت”.
بەھزادی گۆت ژی “ھێشتا ئامار نەھاتیە بەرھەڤکرن بۆ دانا پیڤەران، ل سالا 2005 ھەر فەرمانبەرەکێ 14 خال ھەبانە دا ئەردی وەرگریت، بەلێ نوکە بێگومان ھژمارا کەسێن مفادارنەبووی زۆر زێدەترە، لەوڕا دێ مینیت ل سەر وەزارەتا باژێڕڤانیێ پشتی بەرھەڤکرنا ناڤان دێ جڤاتا وەزیران وەزارەتا پەیوەندار ئاگەھدار بکەت ھەر باژێڕڤانیەکێ چەند ئەرد ھەیە، ل گۆرەی ھەبوونا ئەردێ بەرھەڤ دێ پیڤەر و خال بۆ بەلافکرنا ئەردی ھێنە دانان، چونکو ل سنورێ ھندەک باژێڕڤانیان ئەرد نەمایە بۆ بەلافکرنێ، ل وی دەمی دڤێت وەزارەتا باژێڕڤانیێ ئەردێ چاندنێ ژ وەزارەتا چاندنێ وەرگریت و پشتی گۆھۆڕینا رەگەزێ ئەردی ژ چاندنێ بۆ ئاکنجیبوونێ دێ ئەرد ھێتە بەلافکرن.
ھەروەسا دبێژیت: ھێشتا ئەڤ قۆناغە ماینە، بەلێ پێشبینی دکەم بەلاڤکرنا ئەردی بکەڤیتە سالا بھێت و ئەڤ سالە حوکمەت نەشێت ئەردی بەلافکەت، ئەم وەکی لیژنا باژێڕڤانیان دێ دووڤچوونێ ل سەر بابەتێ بەلاڤکرنا ئەردی کەین و ھەر کەسەکێ گازندە ھەبیت دشێت پەیوەندیێ ب لیژنا باژێڕڤانیان بکەت بۆ چارەسەرکرنا ئاریشەیا وی، ژ بەر کو بەری نوکە ژی مە دووڤچوون بۆ ئاڤاھیێن ئاکنجیبوونێ کریە ئەڤێن ژ لایێ حوکمەتێ ڤە ھاتینە ئاڤاکرن و ب سەر وەلاتیان ھاتینە بەلاڤکرن، چونکو دڤێت عەدالەت ھەبیت ل بەلاڤکرنا پارچێن ئەردی و نابیت وەلاتیێن ماف ھەی ژ وەرگرتنا ئەردی بھێنە بێ بەھرکرن”.

کۆمێنتا تە