حوکمەتێ گاز ژ کەرتێ پیشەسازی بڕی و بەرھەمێ ناڤخۆ دێ گران بیت
ئه‌ڤرۆ نيوز:
پەیڤدارێ دەستەیا وەبەرھێنانا ھەرێما کوردستانێ ئاشکرا کر، وەزارەتا سامانێن سروشتی بڕیار دایە گاز ژ کەرتێ پیشەسازی بھێتە بڕین، ئەڤە ژی دێ بیتە ئەگەرێ بلندبوونا بھایێ بەرھەمێ خۆمالی و دبێژیت: حوکمەتێ سۆزدایە مە کو دێ پێداچوون د ڤێ بڕیارێ دا ھێتەکرن، ئەم رازی نابین بەرھەمێ بیانی پێش بەرھەمێ ناڤخۆ بکەڤیت.
یاسین مەحموود، پەیڤدارێ دەستەیا وەبەرھێنانا ھەرێمێ بۆ رۆژناما ئەڤرۆ خویا کر، وەزارەتا سامانێن سروشتی بڕیاردایە گازێ ل سەر کارگەە و کەرتێ پیشەسازی گران بکەت، ئەڤ چەندە ژی بوویە جھێ دلگرانیا وەبەرھێنەران، چونکو دێ کاریگەریێن خراب ل سەر کەرتێ پیشەسازی ل ھەرێما کوردستانێ ھەبن و ب چو شێوەکی ناھێتە قەبوولکرن و گۆت: “گرانکرن و بڕینا گازێ ل سەر کارگەھێن پیشەسازی دێ بیتە ئەگەرێ گرانبوونا بەرھەمێ ناڤخۆیی و دێ وەلاتی ژ ڤێ بڕیارێ زەرەرمەند بن، چونکو بەرھەمێن پیشەسازی ل بازاڕی دێ ھێنە گرانکرن و بھایێ بەرێ نامینیت، بۆ ڤێ مەرەمێ ژی مە گازندێن خوە گەھاندنە سەرۆکایەتیا جڤاتا وەزیران، مە ب حوکمەتێ راگەھاندیە کو پێگوھۆڕێ پەتڕۆلێ کەرتێ پیشەسازیە، لەو دڤێت گرنگی ب پیشەسازیێ بھێتەدان”.
یاسین مەحموودی ئاماژە ب وێ چەندێ ژی کر، حوکمەتێ سۆزدایە کو دێ پێداچوون د ڤێ بڕیارێ دا ھێتەکرن و گۆت: “پشتی بھێنڤەدانێن سەرێ سالێ دێ دگەل سەرۆکایەتیا جڤاتا وەزیران کۆمبین، حوکمەتێ ژی گۆتیە مە کو دێ ھاریکاریا پێشڤەبرنا کەرتێ پیشەسازی ل ھەرێمێ کەت، دیسا ھاریکاریا وان کارگەھان ژی دێ ھێتەکرن یێن بەرھەمەکێ باش بەرھەم دئینن و رۆلێ خوە د بەرھەمئینانێ دا دیتی، لەوڕا نابیت گاز ل سەر کەرتێ پیشەسازی بھێتە بڕین و گرانکرن یان ژی دڤێت ل خالێن سنووری گۆمرگ ل سەر بەرھەمێ بیانی بھێتە دانان”.
