حوکمەت دێ رۆفاتێن بارزانیان ل پارێزگەھا سەماوە ڤەگەڕینیت
ئەڤرۆ نیوز:
وەزارەتا شەھید و ئەنفالکریان ئاشکرا کر، رۆفاتێن بارزانیان ل پارێزگەھا سەماوە ھاتینە دیتن، لێ ژبەر رەوشا ئەمنیا دەڤەرێ و قەیرانا دارایی نوکە کار بۆ ڤەگەڕاندنا رۆفاتێن ھەشت ھزار ئەنفالکریێن بارزانی ھاتیە ڕاگرتن، لێ پشتی قەیرانێ ھەموو رۆفاتێن ئەنفالکریان دێ ھێنە ڤەگەڕاندن.
فوئاد ئوسمان، پەیڤدارێ وەزارەتا شەھید و ئنفالکریان بۆ رۆژناما ئەڤرۆ دیار کر، دوھی 33 ل سەر ئەنفالکرنا بارزانیان دا بۆرین و ھەتا نوکە ژ سەرجەمێ ھەشت ھزار بارزانیێن ھاتینە ئەنفالکرن ژ لایێ رژێما بەعسا ژ ناڤچویی ڤە، ب تنێ رۆفاتێن 600 ھاتینە دیتن و بۆ ھەرێما کوردستانێ ھاتینە ڤەگەڕاندن و گۆت: “وەزارەتا کاروبارێن شەھید و ئەنفالکریان ل سەر بزاڤێن خوە بۆ ڤەدیتن و ڤەگەڕاندنا رۆفاتێن ھەموو ئەنفالکریێن بارزانیان یا بەردەوامە، چەندین جاران ژی لیژنە بۆ ڤێ مەرەمێ ھاتینە پێکئینان، بەلێ ژ بەر ھەلوەشاندنا وەزارەتا مافێ مرۆڤی یا عیراقێ کارێ مە ب زەحمەت کەفتیە و ھاریکاری کێمبووینە، ژ بەرکو بادەکا دیتنا رۆفاتێن بارزانیان ل وەزارەتا مافێن مرۆڤی بوویە و نوکە وەزارەت نەمایە”.
فوئادی خویا ژی کر، ئەو گۆڕێن بکۆم یێن بارزانیان بەری نوکە ھاتبوونە دیتن، ھەموو ل پارێزگەھا سەماوەنە ل بیابانێن عیراقێ و یێن مایژی ھەر ل ڤێ دەڤەرێ ھاتینە بن ئاخکرن و گۆت: “مە زانیاری ل خەلکێ سەماوە وەرگرتینە، ل گورەی شاھدحالان کار بۆ دیتنا گۆڕێن ئەنفالکریێن بارزانیان دھێنەکرن، لێ ژ بەرکو رەوشا ئەمنی ل پارێزگەھا سەماوە ئالۆزە و قەیرانا دارایی کارێن وەزارەتێ ڕاگرتینە، کارکرن بۆ ئینانەڤا رۆفاتێن بارزانیان ژی ھاتیە ڕاگرتن، ھەر دەمێ رەوشا ئەمنیا سەماوە و قەیرانا دارایی چارەسەربوون، ھەموو رۆفات بۆ دەڤەرێن وان دێ ھێنە ڤەگەڕاندن و رێورەسمێن ژ ھەژی دێ بۆ ھێنەکرن”.