حۆكمه‌تا عێراقێ‌ سۆزا خۆ ل گه‌ل رزگاربوویێن ئێزدی بجهـ نه‌ئیناینه‌

حۆكمه‌تا عێراقێ‌ سۆزا خۆ ل گه‌ل رزگاربوویێن ئێزدی بجهـ نه‌ئیناینه‌

دهۆك، له‌زگین جوقی

به‌رپرسێ‌ نڤیسینگه‌ها رزگاركرنا ره‌ڤاندیێن ئێزدی راگه‌هاند، كارێ‌ لێگه‌ریان و رزگاركرنا ره‌ڤاندیێن ئێزدی دی یێ‌ به‌رده‌وام بیت و هه‌تا نوكه‌ سێ‌ هزار 550 ره‌ڤاندیێن ئێزدی ژ هه‌ردوو ره‌گه‌زان یێن هاتینه‌ رزگاركرن و هێشتا چاره‌نڤیسێ‌ پتر ژ دوو هزار و 700 ره‌ڤاندییان دیارنینه‌ كو هه‌تا ئێك ره‌ڤاندیێ‌ ئێزدی مابیت دێ‌ كاری لێگه‌ریان و رزگاركرنێ‌ یێ‌ به‌رده‌وام بیت.

 

حسێن قائیدی، به‌رپرسێ‌ نڤیسینگه‌ها رزگاركرنا ره‌ڤاندیێن ئێزدی بۆ ئه‌ڤرۆ دیار كر، ل كه‌مپا هولێ‌ دا كچ و ژن و زارۆكێن ئێزدی هه‌نه‌ ده‌ستهه‌لاتداریا رۆژئاڤایێ‌ كوردستانێ‌ هه‌ڤكار نینه‌ بۆ رزگاركرنا ره‌ڤاندییان، ئه‌ڤه‌ بوویه‌ ئه‌گه‌ر هه‌تا نوكه‌ ره‌ڤاندیێن ئێزدی ناڤ كه‌مپا هولی دا بمینن. هه‌روه‌سا ژی كۆمه‌لگه‌ها نێڤده‌وله‌تی ژی نه‌یا هه‌ڤكاره‌. گه‌له‌ك جاران مه‌ داخواز كریه‌ هه‌تا ژی مه‌ شانده‌ك پێك ئینان ژ هنده‌ك كه‌ساتیێن ئێزدی چووینه‌ رۆژئاڤایێ‌ كوردستانێ‌ ده‌ست ڤالا ڤه‌گه‌ریاینه‌”.

حسێن قائێدی گۆت ژی:”ل سالا 2014ێ‌ وه‌ره‌ حكومه‌تا عێراقی چوو پێنگاڤ بۆ رزگاركرنا ره‌ڤاندیێن ئێزدی نه‌هاڤێتنه‌، ئه‌م دووپات دكه‌ین گه‌له‌ك جاران داخواز ژ به‌غدا كریه‌ هه‌ڤكاریا ره‌ڤاندیێن ئێزدی بكه‌ن، لێ‌ نه‌كریه‌. هه‌تا سالا 2015ێ‌  ئه‌ز وه‌كو به‌رپرسێ‌ نڤیسینگه‌ها رزگاركرنا ره‌ڤاندیێن ئێزدی دگه‌ل خه‌یری بۆزانی ب فه‌رمی مه‌ داخواز ژ حكومه‌تا عێراقی كر هاریكاریا ئێزدیان بكه‌ن بۆ رزگاركرنا ره‌ڤاندییان و سوز دان هاریكاریا مه‌ بكه‌ن، به‌لێ‌ هه‌تا نوكه‌ ژی چو هاریكاری نه‌هاتینه‌ كرن و سۆزا خۆ بۆ بابه‌تێ‌ رزگاركرنا ره‌ڤاندیان بجه نه‌ئیناینه‌”.

به‌رپرسێ‌ نڤیسینگه‌ها رزگاركرنا ره‌ڤاندیێن ئێزدی خۆیا ژی كر، بابه‌تێ‌ رزگاركرنا ره‌ڤاندیان بابه‌تێ‌ مرۆڤایه‌تی یه‌ و چو په‌یوه‌ندی ب سیاسیه‌تێ‌ ڤه‌ نینه‌، پێدڤیه‌ هه‌موو كه‌س هه‌ڤكاریێ‌ بكه‌ن بۆ رزگاركرنا ره‌ڤاندییان، چونكو بابه‌ته‌كێ‌ مرۆڤایه‌تی یه‌. ب هه‌ر حال ئه‌م وه‌كو نڤیسینگه‌ها دگه‌ل دام و ده‌زگه‌هێن حكومه‌تا هه‌رێما كوردستانێ‌ دێ‌ رژدبین هه‌تا ئێك ره‌ڤاندیێ‌ ئێزدی مابیت دێ‌ كاركه‌ین بۆ رزگاركرنێ‌.

قائیدی خۆیا كر، هێشتا پتر ژ دوو هزار و700 ره‌ڤاندیێن ئێزدی د دیار نینن، ئه‌م هیڤدارین بابه‌تێ‌ رزگاركرنا ره‌ڤاندیێن ئێزدی ل به‌رچاڤ بهێته‌ وه‌رگرتن و گرنگی پێ‌ بهێته‌ دان ل سه‌ر ئاسته‌كێ‌ گه‌له‌ك باش، هه‌روه‌سا ژی ئه‌م هیڤیدارین هاریكاریا مه‌ بهێته‌ كرن بۆ رزگاركرنا ره‌ڤاندیێن ئێزدی یێن هه‌تا نوكه‌ ل بن ده‌ستێ‌ داعش و خێزانێن داعش دا ماین، هاتنا ڤایرۆسێ‌ كۆرۆنایێ‌ كارتێكرن ل پرۆسه‌یا رزگاركرنا ره‌ڤاندیێن ئێزدی كر “.

حسێن قائیدی، به‌رپرسێ‌ نڤیسینگه‌ها رزگاركرنا ره‌ڤاندیێن ئێزدی ئاشكه‌را كر، هه‌ر كه‌سه‌كێ‌ ژ ده‌ستێن تیرۆرستێن داعش رزگاربیت، ئه‌م فورمه‌كێ‌ بۆ چێدكه‌ین. هه‌روه‌سا ژی داتایێن وێ‌ و چیرۆك و شێوازێن رزگاركرنی چه‌ند مایه‌ د ده‌ستێ‌ تیرۆرستێن داعش دا و چ ب سه‌ری هاتیه‌ هه‌موو دهێته‌ دیكومێنتكرن و پشكنینێن ساخله‌میێ‌ بۆ دهێنه‌ ئه‌نجامدان و هه‌ر تشته‌كێ‌ د شیان دابیت بۆ وان دهێته‌ كرن”.

کۆمێنتا تە