حەفتیا بھێت دێ دەست ب بەلاڤکرنا ملیۆن دیناران ل سەر ئاواران ھێتە کرن

ئه‌ڤرۆ:

جێگرێ رێڤەبەرێ کوچ و کوچبەران ل دھۆکێ بۆ ئەڤرۆ دیار کر کو ھەتا نوکە دۆرێن 120 ھزار خێزانان ھێژ ھاریکاریا ئێک ملیۆن دیناری وەرنەگرتینە و حەفتیا بھێت دێ دەست بەلاڤکرنا وێ ھاریکاریێ ل سەر وان ئاوارێن ماین ھێتە کرن و گۆت: “ژ بەر نەبوونا پارەیی پرۆسەیا بەلاڤکرنا ھاریکاریا ئێک ملیۆن دیناری ھاتبوو راگرتن”.
ئیسماعیل ئیسلام حامد، جێگرێ رێڤەبەرێ کوچ و کوچبەران ل دھۆکێ ئاشکرا کر، ژ ئەگەرێ نەمانا پارەی ئەڤە نێزیکی 15 رۆژان بوو بەلاڤکرنا ھاریکاریا ئێک ملیۆن دیناری ل سەر ئاواران ھاتیە راگرتن و گۆت: “ھەتا نوکە دۆرێن 110 ھزار خێزانێن ئاوارەی پارێزگەھا دھۆکێ بووین ژ ھاریکاریا ئێک ملیۆن دیناری مفاداربووینە، حەفتیا بھێت جارەکا دی دآ دەست ب بەلاڤکرنا پارەی ھێتە کرن، کو دۆرین 120 ھزار خێزانان ھێژ وەرنەگرتیە”.
ناڤبری ئەو ژی خویا کر، ل دووڤ بڕیارا وەزارەتا کوچ و کوچبەران ئەگەر خێزان ژ دو کەسان پێک ھاتبیت رەنگە ملیۆن دیناران وەرنەگریت، بەلکو کێمتر پێ بھێتە دان و ئەگەر خێزانەک ژ 10 کەسان و پتر بیت ژ ملیۆنەکێ پتر دێ وەرگریت و گۆت: “ل دەستپێکێ پارە دێ بۆ خەلکێ شنگالێ ھێتە مەزاختن، چونکو ئەوان چ د گەل خوە نەئینایە و ب تنێ گیانێ خوە رزگارکریە”.

کۆمێنتا تە