حەفت گۆڕێن بکۆم ھاتنە دیتن
ئه‌ڤرۆ نيوز:
پەیڤدارێ وەزارەتا شەھید و ئەنفالکریان ئاشکراکر، ل نێزیک دۆڕیانا حەردان حەفت گۆڕێن بکۆم ھاتنە دیتن، بەلێ ژبەر نێزیکیا وان ژ تیرۆرستێن داعش کار تێدا ناھێتەکرن و ھەر دەمێ رەوشا دەڤەرێ ئارام بۆ دێ ژلایێ تیمێن تایبەتڤە ھێنە راکرن.
فوئاد عوسمان، پەیڤدارێ وەزارەتا شەھید و ئەنفالکریان ل حوکمەتا ھەرێما کوردستانێ بۆ ئەڤرۆ گۆت:” ل نێزیک دۆڕیانا حەردان حەفت گۆڕێن بکۆم ھاتنە دیتن و ئەڤ گۆڕە یێن وان وەلاتیانە، دەمێ تیرۆرستێن داعش ھێرش کریە سەر دەڤەرێ و ژلایێ وان ڤە ھاتبوونە گوللە بارانکرن و پشتی ھنگی ھاتینە ڤەشارتن دناڤا گۆڕێن بکۆمدا”.
ناڤھاتی دیار کر، کو دەمێ ئەڤ دەڤەرە ژلایێ ھێزێن پێشمەرگەی ھاتینە رزگار کرن وەزارەتا وان ھاتە ئاگەھدارکرن، کو ھژمارەکا گۆڕێن بکۆم ل دەڤەرێ ھەنە و پشتی ڤەکۆلین ژلایێ تیمێن تایبەت یێن کۆلانا گۆڕێن بکۆم ھاتیە کرن دیاربوو کو رۆفاتێن ھژمارەکا وەلاتیێن سڤیل د ناڤ وان گۆڕان دانە و رەنگە کوردێن ئێزدی بن و بشێوەیەکێ گەلەک دڕندانە ھاتینە کوشتن.
ناڤبری گۆت:” ئەڤ گۆڕێن ھەتا نوکە ھاتینە دەستنیشانکرن حەفت گۆڕێن بکۆمن و دکەڤنە نێزیک دۆڕیانا حەردان، بەلێ ژبەر نە ئارامیا رەوشا ئەمنیا دەڤەرێ تیمێن وەزارەتێ نەشێن کار تێدا بکەن، چونکی ژلایێ ھێزێن پێشمەرگەی ڤە ھاتینە ئاگەھدارکرن، رەنگە قەناسێن تیرۆرستێن داعش تیمێن ڤەکۆلینێ بکەنە ئارمانج و ھەر دەمێ مەترسی ل سەر دەڤەرێ نەما دێ ھەر حەفت گۆڕ ھێنە راکرن”.
