حەیدەر شەشۆ به‌رسڤا په‌كه‌كێ دده‌ت
ئه‌ڤرۆنيوز:
سه‌رۆكێ پارتيا ئێزدى يا ديموكراتى دپارچه ڤيديۆيه‌كێ دا به‌رسڤا راگه‌هاندنا په‌كه‌كێ دده‌ت كو ئه‌و تۆمه‌تباركربوو كو ده‌ست دپشت هێرشا ئه‌سمانى يا توركى وكوشتنا زه‌كى شنگالى دا هه‌بوو كو بلندترين فه‌رماندێ په‌كه‌كێ بوو ل شنگالێ.
حه‌يده‌ر شه‌شۆ، سه‌رۆكێ پارتيا ئێزدى يا ديموكراتى د وێ پارچه ڤيديۆيێ دا داخوازێ ژ كوردێن ئێزدى دكه‌ت كو دهشياربن وچو ده‌مه‌كى رێ نه‌ده‌ن خه‌لكه‌كێ دى ئێزديان بكاربينن تاكو ئێزدى نه‌بنه قوربانى پلانێن سياسى.
شه‌شۆ دبێژيت” ل رۆژێن بۆرى ته‌له‌ڤزيۆنا (چرا) يا سه‌ر ب په‌كه‌كێ ڤه به‌رنامه‌ك به‌خشكر وتێدا ئاماژه دا كو حه‌يده‌ر شه‌شۆ وقاسم شه‌شۆ ده‌ست دكوشتنا زه‌كى شنگالى دا يێ هه‌ى، ئه‌ز دبێژمه گه‌لێ ئيزدى چو ده‌مه‌كى ئه‌و كارێ ترسينۆك كارێ مه نه‌بوو، هه‌كه مه ناكۆكيێن سياسى ژى هه‌بن، به‌لێ چو ده‌مه‌كى كاره‌كێ ب وى شێوه‌ى ناكه‌ين ومه په‌يوه‌نديا به‌رده‌وام ل گه‌ل زه‌كى شنگالى هه‌بوو”.
زێده‌تر دبێژيت” مخابن هنده‌كان دخوازت وى بابه‌تى بكه‌نه كێشه‌ك دناڤ ئيزديان دا و وێ تۆمه‌تا بێ بنه‌ما به‌لاڤ دكه‌ن، ئه‌و كارێ چرا تى ڤى بۆ هه‌لكرنا فتنێ وئاژاوێ يه دناڤ ئێزديان دا”.
حه‌يده‌ر شه‌شۆ روو دكه‌ته په‌كه‌كێ ودبێژيت”هوون نه‌شيان كه‌سێن ب سه‌ر ميتێ ڤه ژناڤ خوه نه‌هێلن ودووماهيێ ب وان كه‌سان بينن كو نيازا خيانه‌تكرنێ هه‌بوو، چاوان وه‌سا ب هوورى جهێ زه‌كى شنگالى هاته زانين، هه‌كه ده‌ستێ مه‌زن يێ هه‌وه دشت را نه‌بيت؟ له‌وما ئه‌وێن من وقاسم شه‌شۆى تۆمه‌تبار دكه‌ن،نيڤا وان ميتێن توركيا نه، پێيه‌كێ هه‌وه يێ ل توركيا وپێيه‌كێ دى يێ هه‌وه يێ ل ئه‌لمانيا، هوون خائين وخوه فرۆشن”.
گۆت ژى” پێدڤى بوو گه‌لێ ئێزدى ل ئه‌لمانيا حه‌فتيه‌كێ بهێنه سه‌ر جاده‌يان ووێ تاوانێ ريسوا بكه‌ن، نوكه ده‌ست ب به‌لاڤكرنا تۆمه‌تان بكه‌ن، شنگال يا ئێزديان وئێزيدخانێ يه، يا په‌كه‌كێ وپارتى وئێكه‌تيێ نينه، من نه‌دخواست به‌رسڤا هه‌وه بده‌م، به‌لێ چونكى بێ ده‌نگى ونه‌به‌رسڤدانا من ئاخڤتن ل ده‌ڤ خه‌لكى دروست كربوو، كو هه‌كه حه‌يده‌ر شه‌شۆى وقاسه شه‌شۆى ده‌ست دپشت وێ چه‌ندێ را نينه، بۆچى به‌رسڤێ ناده‌ن”.
