خاله‌كا نوو یا سه‌ربازی ل گوندێ هرۆرێ هاته دانان
به‌رواری بالا، زنار تۆڤی:
پاسه‌وانێن سنووری یێن ئیراقێ دوهی خاله‌كا نوو یا سه‌ربازی، ل ده‌وروبه‌رێن گوندێ هرۆرێ ل ناوچه‌داریا كانی ماسێ یا سه‌ر ب ده‌ڤه‌رداریا ئامێدیێ ڤه دانا.
رێڤنگ هرۆری، ئه‌ندامێ په‌رله‌مانێ كوردستانێ ل سه‌ر فراكسیۆنا پارتی دیمۆكراتی كوردستان بۆ رۆژناما ئه‌ڤرۆ دیار كر، هێزێن پاسه‌وانێن سنووری یێن ئیراقێ خاله‌كا نوو یا سه‌ربازی ل هنداڤی گوندێ هرۆرێ ل په‌تایی، كو دكه‌ڤیته باشوورێ گوندی دانایه، ئه‌و خالا نوو یا سه‌ربازی نێزیكی 600 مه‌تران ژ گوندی دووره، هه‌روه‌سا ئه‌و جهێ خالا نوو لێ هاتیه دانان، رۆژانه ژ ئالیێ تۆپخانێن توركیاڤه دهاته تۆپباران كرن و ترس ل ده‌ف خه‌لكێ گوندی په‌یدا دكر و گۆت: “پشتی ئه‌ڤ خاله هاتیه دانان، ئه‌م ب هیڤینه و پێشبینی دكه‌ین، كو ره‌وشا گوندێ هرۆرێ باشتر لێ بهێت و پتر ئارامی تێدا په‌یدا ببیت، هه‌روه‌سا ئه‌ڤه خالا حه‌فتێ یا سه‌ربازیه ل ده‌ڤه‌را به‌رواری بالا دهێته دانان”.
ناڤهاتی گۆتژی: “ئه‌ڤه پتری ساله‌كێیه گوندێ هرۆرێ و ده‌وروبه‌رێن وی ژ ئالیێ تۆپخانه و فرۆكێن توركیا ڤه دهێنه بۆردومان كرن و چه‌ندین جاران تۆپێن سۆپایێ توركیا ل ناڤا گوندی كه‌فتینه و زیانێن مه‌زن یێن مادی گه‌هاندینه خه‌لكێ گوندی و د هه‌مان ده‌م دا، ژ ئه‌نجامێ تۆپبارانێن توركیا هه‌تا نوكه چه‌ندین وه‌لاتیێن وی گوندی بریندار بووینه”.
