خامنەیی: دانوستاندن ل گەل ئەمریکا شاشیەکا مەزن بوو
ئەڤرۆ نيوز:
سەرۆکێ شۆرەشا ئیسلامی یا ئیرانێ عەلی خامنەیی راگەھاند کو ھەڤدیتنێن بەری نھا د ناڤبەرا ئیرانێ و ئەمریکا دا ل دۆر بەرنامێ ئەتۆمی شاشیەکا مەزن بوو و پێدڤی بوو ئیرانێ ئەو یەک نەکربا، چونکو ئەمریکا چو دەمەکێ جھێ باوەریێ نەبوویە و ئێدی ئیران بۆ چارەکرنا پرسێن خوە ل گەل ئەمریکا دانوستاندنان ناکەت و گۆت: (ئەز دەستپێکێ ژی ل دژی دانوستاندنان بووم، لێ ھەڤالێن مە د رژد بوون کو ئەم پرسێن خوە ل گەل ئەمریکا ب رێیا دانوستاندنان چارە بکەین، لێ نھا ئاشکرا بوو کو ئەمریکا ناخوازیت پرس چارەسەر بن، بەلکو ئەمریکا دخواست ھەموو مەرجێن خوە ل سەر مە بسەپینیت و بێگومان ئەم ڤێ یەکێ قەبوول ناکەین).
عەلی خامنەیی د پشکەکا دی یا ئاخڤتنا خوە دا ئەو یەک ژی دیار کر کو ئەمریکا ناھێلیت پرسێن رۆژھەلاتا ناڤین بھێنە چارەکرن و قەیرانا نھا ل رۆژھەلاتا ناڤین ھەموو بەرھەمێن سیاسەتا ئەمریکا نە، ژ بەر ھندێ ژی ئەز جارەکا دی دبێژم کو دانوستاندنێن بەری نھا ل گەل ئەمریکا ھاتنە کرن شاشیەکا مەزن و ستراتیژی بوو و ئێدی ئەو یەک ب چو رەنگەکێ دوبارە نابیت و گۆت: (ئەز باوەرم ھەموو کەسەکێ نیەتا ئەمریکا یا خراب دیت و بۆ ھەموو وەلاتەکێ ژی ئاشکرا بوو کو ئەمریکا ناخوازیت پرسگرێکان چارە بکەت، بەلکو وان دڤێت پرسێن ھەی مەزنتر بکەن و ژ بەر ھندێ ژی ئێدی ئیران ب چو رەنگەکێ ل گەل ئەمریکا دانوستاندنان ناکەت).
