خانمەکا دھۆکێ ل بەرە کارگەھەکا چێکرنا شیرێ زارۆیان دانیت
ئەڤرۆ، شاکر ئەتروشی:
خانمەکا دھۆکێ کو بۆ دەمێ پتر ژ دەە سالانە ل ولاتێ ئەلمانیا د وارێ بازرگانیێ دا کاردکەت بۆ ئەڤرۆ دیار کر بەری چەندەکێ ئەو ڤەگەریایە باژێرێ خوە و نھۆ وەکو بازرگانەکا بچووک دوارێ جلکێن زارۆیان و ئێکسسواراتاندا کاردکەت و ھەموو ھیڤی ئومێدێن وێ ئەون ل پاشەرۆژێ بشێت کارگەھەکا چێکرنا شیرێ زارۆیان ل دھۆکێ دانیت.
ھەلز ئەحمەد گۆت: ئەڤە پتری بیست سالانە ئەز ل ولاتێ ئەلمانیا دژیم، ل دووڤ حەزا خوە ل باژێرێ لوبید ل وی ولاتی ئەز چوومە کولیژا کارگێری و ئابووری و ب سەرکەفتیانە من ب دووماھی ئینا، د دووڤدا من حەزکر دوارێ تایبەتمەندیا خوەدا کار بکەم، ئەو بوو ئێکەم پێنگاڤ من ل وی ولاتی دەستپێکری و ئەز شیام تارادەیەکی سەربکەڤم و نھۆ ئەز بریکارا سەرەکی یا دو کۆمپانێن جلک و ئێکسسواراتا مە.
د دووڤدا گۆت: پشتی دەە سالێن کارکرنێ ل وی ولاتی من بریاردا ڤەگەرمە ولاتێ خوە کوردستانێ و ئەڤە بۆ دەمێ پتر ژ پێنج ھەیڤانە ئەزا ل دھۆکێ، ل ڤێرە مەچەند دوکان بۆ وان پێدڤیان دەستنیشانکرینە و جارێ ل ڤێرە ئەم یێ ل دەستپێکا کارێ خوە و ھیڤیا من ئەوە ھێدی ئەم پرۆژێ خوە بەرفرەھتر لێ بکەین و رۆژەک بھێت مەبریکار ل ھەموو باژێران ھەبن.
ھەروەسا گۆت: ھەر چەندە دانانا کارگەھەکا چێکرنا شیرێ زارۆیان نەکارەکێ ب ساناھی یە و گەلەک پارە پێ دڤێن، لێ ھیڤیا من ئەوە رۆژەک بھێت ئەز ب خوە بشێم کارگەھەکا شیری ل دھۆکێ دانم و دێ بزاڤێ بۆ ڤێ چەندێ کەم. ل دووماھیێ ھەلز خانێ گۆت: کا چاوا زەلامێ کورد شیان ھەنە دوارێ بازرگانیێ دا کاربکەت وەسا ژنا کورد ژی ئەو ماف ھەیە، لێ مخابن ل ڤێرە ھێشتا ھندەک رەوشت و تیتالێن ھەین وێ دەلیڤێ نادەنە ژنێ، لێ ھەر چاوا بیت دڤێت ژن ژخوە نەترسیت و باوەری ب خوە ھەبیت بھێتە ڤێ مەیدانێ.
زێده‌تر گۆت: دەمێ ل دەستپێکێ من دەست ب ڤی کاری کری ھندەک ئاستەنگ بۆ من ژی ھاتنە پێش، لێ ئەز شیام خوە ژێ رزگارکەم و نھۆ یا سەرفەرازم کو دوارێ بازرگانیێ دا کار دکەم و ھیڤیا من ژ ھەموو ژنێن کورد ئەوە بیێ ترس خوە پاڤێژنە ڤێ مەیدانێ.