خدر محەمەد حەسەن: بۆ بەرژەوەندا خەلکێ کوردستانێ دێ کاری د راستڤەکرنا ھندەک قانوونان دا کەین
ئەڤرۆ، زنار تۆڤی:
مافپەروەر خدر محەمەد حەسەن، بەربژارێ ژمارە 55 ل سەر لیستا 183 یا پارتی دیموکراتی کوردستان ل سنوورێ لقا ھەشت یا پارتی ل زاخۆ بەرنامێ کارێ خوە بۆ رۆژناما ئەڤرۆ دیارکر: ھەکە وی باوەریا وەلاتیێن کوردستانێ ب دەستڤە ئینا و بۆ پەرلەمانتار، ئەو دێ پرۆژێ لیستا 183 یا پارتی بجە ئینیت و ئەڤە ئێک ژ خالێن سەرەکی یێن کارێ وی یە، ھەروەسا ھەر کارەکێ ل بەرژەوەندا خەلکێ دابیت ئەو دێ وی کاری لدووڤ تایبەتمەندیا کارێ خوە وەکو مافپەروەر ئەنجام دەت، ژبەرکو ئەڤە ماوێ 15 سالانە ئەو د وارێ قانوونێ دا کار دکەت، دیسا ژ سالا 2010 ھەتا نوکە وی پۆستێ جێبەجێکرنا کارێ داد وەرگرتیە ل رێڤەبەریا جێبەجێکرنا زاخۆ، زێدەباری کارێ خوە ھەر ژ سالا 2011 ھەتا نوکە دەستھەلاتا تێبینەریا ناکامان ل زاخۆ وەرگرتیە، ھەروەسا ئەو دێ بزاڤێ کەت کو ئەو پرۆژە و مادێن قانوونی یێن لاواز بھێنە راستڤەکرن د بەرژەوەندا خەلکێ کوردستانێ دا، ناڤھاتی زێدەتر دبێژیت: ھەکە ھات و وەلاتیەکێ پارێن ئێکێ خواربن و پارێن وی نەدەتێ و بێژیت من پێچێنابیت پارێن وی بدەمێ، لدووڤ قانوونا عیراقێ ئەو وەلاتی دێ بۆ ماوێ چار ھەیڤان ھێتە زیندانکرن، لێ گەلەک لاوازی دڤێ قانوونێ دا ھەنە، ئەڤ قانوونە ل سالا 1980 دەرکەفتیە، کو ل وی دەمی خەلکێ داھاتەکێ کێم ھەبوو، لەوما چار ھەیڤ ھاتینە دانان، لێ نوکە ھندەک ھەنە گەلەک پارێ وەلاتیان خواریە و نەدایێ و دادگەھێن مە کاری ب وێ قانوونێ دکەن، لەوما دڤێت ئەو قانوونە بھێتە راستڤەکرن، چونکی ژبەر لاوازیا ڤێ قانوونێ گەلەک وەلاتیان تەشقەلە و حیلە کرینە، ھەر چەندە گەلەک قانوونێن دیتر ھەنە کو ئەم ل سەر کار بکەین، لێ ئەڤ قانوونە ژ ھەموویێن دیتر یا فەرترە کو بھێتە راستڤەکرن و دڤێت ماوێ زیندانکرنێ لدووڤ گۆژمێ پارەی بھێتە دیارکرن و دووماھیک سزا بگەھیتە پێنج سالان.
خدر ھێشتا دبێژیت: ژ بلی کارێن قانوونی مە ل بەرە چەندین کار و پرۆژان ب رێیا پەرلەمانێ کوردستانێ بۆ خەلکێ زاخۆ ئەنجام بدەین، ھندی ئەم بۆ خەلکێ زاخۆ بکەین ھێشتا کێمە، ژبەرکو خەلکێ زاخۆ گەلەک شەھید و قۆربانی داینە، خەلکێ زاخۆ گەلەک قارەمان و کورد پەروەرن، ھەر چەندە کار بۆ خەلکێ زاخۆ ھاتیە کرن، لێ دڤێت حوکمەتا ھەرێمێ پتر کار و پرۆژان بۆ خەلکێ زاخۆ ئەنجام بدەت، ھەروەسا دێ ئەولەویاتا کارێ وی راستڤەکرنا ھندەک قانوونان بیت د بەرژەوەندا خەلکێ کوردستانێ دا، دیسا ھشیاریەکا باش بۆ خەلکێ مە ل سەر قانوونێ چێبوویە.
خدر محەمەد حەسەن ل سالا 1966 ل گوندێ سێقووبا ل دەڤەرا زۆمار ژ دایک بوویە، ل سالا 1983 پەیمانگەھا تەکنیکی ب دووماھی ئینایە و ل سالا 2003 کۆلیژا قانوونێ ل مۆسا خواندیە، سەرۆکێ لیژنا زاخۆ یا ئێکەتیا مافپەروەرێن کوردستانێ یە، دیسا دو برایێن وی ژی شەھید بووینە و ھەروەسا شارەزایەکا باش د زمانێن عەرەبی و ئنگلیزی دا ھەیە، د وارێ قانوونێ دا تایبەتمەندە و شارەزایی د ددانا پرۆژە و قانوونان و قانوونێن کارپێکریێن ھەرێما کوردستانێ و عیراقێ ھەیە.
