خودانەکێ ب ھێز یێ بۆ سوننێن عیراقێ پەیدا بووی
ئەڤرۆ:
پشتی پێکئینانا ھەڤپەیمانیا وەلاتێن سوننی ل دژی حوسیێن یەمەنێ کو ژلایێ ئیرانێ ڤە پشتەڤانی لێ دھێتە کرن، بەحسێ وێ چەندێ دھێتە کرن کو رەنگە سوننێن عیراقێ ژی ب ھێز بکەڤن، ژ بەر کو ھێرشا (عاصفە الحزم) یا وەلاتێن سوننی یێن عەرەب ب پشتەڤانیا ھەر دو وەلاتێن پاکستان و تورکیا ل دژی بەرژەوەندیێن ئیرانێ و ھەڤپەیمانێن وێ ب تنێ ل یەمەنێ ناراوەستن بەلکو دێ درێژبنە وەلاتێن دی یێن دەڤەرێ ژی ب تایبەتی ژی عیراقێ ژ بەر کو پشتی ژناڤچوونا رژێما سەدام ل ٢٠٠٣ دەستھەلاتدارێن شیعە ل بەغدا سوننە پشتگوە ھاڤێتینە و ژ ناڤەندا بریارێ دوورئێخستینە.
ل دۆر ڤی بابەتی ئەندامێ جڤاتا نوونەرێن عیراقێ ژ فراکسیۆنا ئێکگرتوویا ئیسلامی، عادل نوری دبێژیت” پشتی گورزا نەچاڤەرێکری یا (عاصفە الحزم) یا وەلاتێن کەنداڤی و تورکیا و پاکستانێ ل دژی حوسیێن یەمەنێ، مەترسیەکا مەزن دێ بەرێخودەتە ھەرێمێ و پێدڤیە کورد خوە بۆ خولەکا دی یا ھەڤرکیان و مەترسیان ئامادە بکەن و ناکۆکیێن خوە پاشبێخن”.
ل دووڤ گۆتنێن عادل نوری، کوردان کێشا ئەردی یا ل گەل سوننان ھەی و کێشا دەستھەلاتێ یا ل گەل بەغدا ھەی و ل گۆر باوەرا وی د ماوێ ١٢ سالێن بۆری دا سوننێن عیراقێ د پارچەکری بوون، لێ کورد نەشیان کێشا ئەردی ل گور مادێ ١٤٠ ل گەل وان ئێکلا بکەن.
عادل نوری ئاماژێ ب وێ یەکێ دەت کو پشتی ھێرشا وەلاتێن سوننی بۆ سەر حوسیێن یەمەنێ، نوکە کێشا سوننان یا بوویە کێشەکا نێڤدەولەتی و خودانەکێ ب ھێز یێ بۆ وان پەیدا بووی و ژ نوکە وێڤە کێشا کوردان ب تنێ ل گەل عەرەبێن حەویجە و گرۆپێن شەمەر و عوبێدا نابیت، بەلکو ھەڤپەیمانیەکا ب ھێز یا ل پشتا وان.
پشتی کونترۆلکرنا مووسلێ ژلایێ داعشێ ڤە ل ھەیڤا شەش یا سالا بۆری، لەشکرێ عیراقێ ل پتریا دەڤەرێن کوردستانی یێن دەرڤەی ئیدارا ھەرێمێ ڕەڤی و پێشمەرگەی پتریا دەڤەرێن کوردستانێ کونترۆلکرن و ل دووماھیا خزیرانا ٢٠١٤ سەرۆکێ ھەرێما کوردستانێ ل ھەولێرێ د کۆنگرەکێ رۆژنامەڤانی دا ل گەل وەزیرێ دەرڤەیێ بریتانیا ئاماژە ب وێ چەندێ دا کو مادێ ١٤٠ بجە ھات و ئێدی ئەو ل سەر نائاخڤن.
لێ گەلەک جاران سیاسەتمەدار و پەرلەمانتارێن عیراقێ ژ سوننا و شیعان، کورد ب وێ چەندێ گونەھبار کرینە کو ھاتنا داعشێ بۆ خوە بکارئیناینە دا کو دەڤەرێن کێشە ل سەر کونترۆل بکەن و ھەروەسا ھندەک سیاسەتمەدارێن عیراقێ، کورد ب دەرکرنا عەرەبان ژ ھندەک دەڤەرێن کێشەدار گونەھبار کرینە، لەوما ژی یا چاڤەرێکریە عەرەب زوو ب زوو دەستان ژ وان دەڤەران بەرنەدەن و ھەردەمێ ھەست ب ھێزبوونێ بکەن، یان پشتەڤەنەک ھەبیت د ئامادەنە بۆ دوبارە کونترۆلکرنا وان دەڤەران، شەرێ کوردان بکەن.
ل دووڤ گۆتنێن عادل نوری، پشتی (عاصفە الحزم)، پەرلەمانتارێ عیراقی مشعان جبوری گەفێن وێ چەندێ ل کوردان کرن کو ئەو وەکو سوننە د ئامادەنە ھەڤپەیمانیێ ل گەل شەیتانی بکەن ھەتا کو پێشمەرگەی ژ دەڤەرێن کێشەدار دەربێخن، ژ بەر کو ل دووڤ گۆتنێن مشعانی، کورد دوژمنێن وانن.
رەنگە ل دەمەکێ نێزیک سوننێن عیراقێ نەشێن خوە رێکبێخن ھەتا کو بشێن مەترسیێ ل سەر ھەرێما کوردستانێ دروست بکەن، ژ بەر کو ژبلی وێ چەندێ کو ناکۆکیێن دژوار د ناڤبەرا ئالیێن سوننی یێن عیراقی دا یێن ھەین و ھەتا نوکە نەشیاینە ببنە خودان گۆتارەکا ئێکگرتی، داعشێ پتریا دەڤەرێن وان یێن کونترۆلکرین و دەم دڤێت ھەتا کو ئەو وان دەڤەران ژ داعشێ پاقژ بکەن و خوە رێک بێخن، لێ د سەر ھندێ ڕا ژی ھەکە وەلاتێن عەرەبی یێن سوننی و پاکستان و تورکیا بشێن بەرەیێ سوننی ل دەڤەرێ ب ھێزتر بێخن و پشتەڤانیێ ل سوننێن عیراقێ ژی بکەن، ل پاشەرۆژێ سوننە دێ بنە مەترسی ل سەر بەرژەوەندیێن ھەرێمێ، لەوما پێدڤیە ھەرێما کوردستانێ ئامادەکاریێن خوە بکەت و بۆ ھەر پێشھاتەکێ یا ئامادە بیت، ژ بەر کو ھەتا نوکە زلھێزێن جیھانێ ژی پشتەڤانی ل وی بەرەیێ سوننی کریە.
