خوه‌نيشانده‌رێن زيقار داخوازا كێمكرنا بهايێ كاره‌بێ وئاڤێ وسزادانا گه‌نده‌لان دكه‌ن
ئه‌ڤرۆنيوز:
رۆژنامه‌ڤانه‌كێ پارێزگه‌ها زيقار ل باشوورێ عيراقێ بۆ ئه‌ڤرۆنيوز دياركر، خوه‌نيشانده‌رێن پارێزگه‌ها زيقار 12 داخوازى پێشكێشى حوكمه‌تا عيراقێ كرينه بۆ بجهئينانا وان.
محه‌مه‌د ئه‌لهيلالى، رۆژنامه‌ڤان ژ باژێرێ ناسريه سه‌نته‌رێ پارێزگه‌ها زيقار بۆ ئه‌ڤرۆنيوز گۆت” خوه‌نيشانده‌رێن پارێزگه‌ها زيقار 12 داخوازى ب نڤيسين پێشكێش كرينه كو شێخ (حسێن ئه‌لخه‌يون) ئێك ژ كه‌سايه‌تيێن پارێزگه‌هێ ژ پێش خوه‌نيشانده‌ران ڤه ئيمزاكريه.
دياركر ژى” هنده‌ك ژوان داخوازيان گرێداى حوكمه‌تا خوه‌جهى يا پارێزگه‌ها زيقارن وهنده‌ك ژى گرێداى كارێ حوكمه‌تا ناڤه‌ندى يه ل به‌غدا”.
ل دۆر گرنگترين داخوازيێن خوه‌نيشانده‌رێن زيقار، محه‌مه‌د ئه‌لهيلالى گۆت” گرنگترين داخوازى لادانا رێڤه‌به‌رێ باژێرڤانيا ناسريه وقايمقامێ ناسريه وهه‌موو به‌رپرس ورێڤه‌به‌رێن چار سال ل سه‌ر وه‌رگرتنا پۆستێن وان بۆرين”.
سه‌باره‌ت داخوازيێن ژ حوكمه‌تا ناڤه‌ندى، گۆت” داخواز هاتيه كرن لژنه‌ك بهێته پێكئينان كو يا تايبه‌ت بيت ب دامه‌زراندنێ ل كۆمپانيا په‌ترۆلا باشوور ولادانا ئه‌ندامێن لژنا نوكه دكار دا”.
ئاماژه دا كو ئێك ژ داخوازيان ژى ئه‌و بوويه كو ده‌سته‌يا ده‌ستپاكيێ ب رۆلێ خوه يێ چاڤدێريێ رابيت وكه‌سێن تۆمه‌تبار ب باده‌كێن گه‌نده‌ليا دارايى وكارگيرێ بهێنه سزادان”.
محه‌مه‌د ئه‌هيلالى گۆت ژى” داخوازيه‌كا دى يا گرنگ يا خوه‌نيشانده‌رێن زيقار ئه‌وبوو كو دوباره لێزڤرين دبهايێ كاره‌بێ دا بهێته كرن وبهايێ وێ بزڤريت وه‌كو به‌رى سالا 2013 ولژنه‌ك بهێته دروستكرن ل دۆر ئه‌گه‌رێ دانانا بهايێ نوكه يێ ئاڤێ”.
خوياكر ژى” ژ ئه‌نجامێ خوه‌نيشاندانێن ناسريه 46 كه‌س برينداربوون كو 17 ژوان ژ خوه‌نيشانده‌ران بوون و 29 كه‌س ژى ژ هێزێن ئه‌منى بوون كو پاراستنا باره‌گايێ جڤاتا پارێزگه‌ها زيقار دكر”.