خێزانێن شەهیدان بەرێ بنیاتی بۆ مۆزەخانا ئەنفالان ل كەلها نزاركێ دانا
ب هەلكەفتا بۆرینا 36 سالان ل سەر ئەنفالێن رەش، دوهی 14/4/2024 و ب چاڤدێریا د. عەلی تەتەر، پارێزگارێ دهۆكێ و ب ئامادەبوونا نوونەرێ نڤیسینگەها رێكخستنا پارتی ل پارێزگەها دهۆكێ و بەرەڤان حەمدی، بریكارێ وەزارەتا شەهید و ئەنفالكریان و د. نەوزاد عەبدوللا، بەرپرسێ لقێ ئێك و هەژمارەكا خێزانێن شەهیدان و ئەنفالكریان و هەژمارەكا سەرمایەدار و وەبەرهێنەران بەرێ بنیاتی بۆ چێكرن و بەرفرەهكرنا مۆزەخانا ئەنفالان ل كەلها نزاركێ ژ لایێ خێزانێن شەهیدێن ئەنفالان ڤە هاتە دانان.
پارێزگارێ دهۆكێ د پەیڤەكێ دا گرنگیا چێكرنا مۆزەخانێ دیار كر و سوپاسیا مەسرور بارزانی، سەرۆكێ حوكمەتا هەرێما كوردستانێ كر ل دۆر پشتەڤانیكرنا وی بۆ چێكرنا مۆزەخانا كەلها نزاركێ.
هەروەسا سوپاسیا وان سەرمایەداران كر یێن كو پشكداری د پڕۆژەیێ چێكرنا مۆزەخانێ دا كری و تەكەز كر كو ئەڤ پڕۆژە ب چەند قووناغان دێ هێتە ئەنجامدان و هەموو نەهامەتی و دەردەسەریێن ئەنفالبوویان و ئەو تاوانێن نەمرۆڤاتی یێن رژێما بەعس هەمبەر خەلكێ پارێزگەهێ و كوردستانێ ئەنجامداین، د مۆزەخانێ دا دێ هێنە بەرچاڤكرن.
هەژی گوتنێ یە مۆزەخانە ب هەڤپشكی د ناڤبەرا پارێزگەها دهۆكێ و سەرمایدارێن دەڤەرێ ب گوژمێ ملیارەك و 271 ملیۆن دیناران وەكو قووناغا ئێكێ دێ هێتە ئەنجامدان.
