خەلكێ دهۆكێ حەز ژ تۆڤچایێ (نەعناعێ) دكەن
سندس سالح سلێڤانەیی
محەمەد عەبدولكەریم، بازرگانەكێ خەلكێ بەغدایە و ئێك ژ پشكدارێن فێستیڤالا چارێ یا بازاڕگەڕییا وەلاتێ (مسرێ) یە، ئەوا بەری سێ حەفتیان ل پارێزگەها دهۆكێ هاتیە ڤەكرن، د دیدارەكێ دا بۆ رۆژنامەیا ئەڤرۆ گۆت: مە وەك كۆمپانیەكا عیراقی ئەڤە جارا سێیێ یە پشكداریێ دڤێ فێستیڤالێ دا كەین و مە بەرهەمێن خۆ نیشاداینە، كو ئەو ژی تۆڤێ چایا فێقیێ هشكە وەك (لەیمون و نەعناع و تی) و گەلەك جۆرێن دی و ب راستی چەند جارەكا ئەم دهێین جواهیەكا مەزن دبینن و ئەڤە نیشانا هندێ یە كو برایێن مە یێن كورد ل پارێزگەها دهۆكێ گەلەك حەزژ ڤان جۆرە فێستیڤالان دكەن، لەورا گرنگیەكا باش پێ ددەن.
هەروەسا گۆت: سەبارەت بەرهەمێن مە ژی هەموو جۆر دهێنە فرۆتن، لێ یێ سەرەكی و پتری هەموویان دهێتە فرۆتن تۆڤێ چایا نەعناعێ یە كو خەلكێ دهۆكێ گەلەك حەزژێدكەن، هەروەسا ل هەولێرێ ژی هەمان داخوازی ل سەر هەبوو، لێ ل پارێزگەهێن دی یێن ناڤەڕاست و ژێریا عیراقێ داخوازی ل سەر هندەك جۆرێن دی یە، بۆ زانین مە پشكداری د گەل فێستیڤال و پێشانگەهێن بڤی رەنگی دا كریە ل هەموو پارێزگەهێن عیراقێ و دەرڤە و ئەز دبینم ئەڤ فێستیڤالا ل دهۆكێ هاتیە ڤەكرن یا سەركەفتیە.
