خەلكێ دهۆكێ حەز ژ خوارنێن (مسری) دكەن
سندس سالح سلێڤانەیی
شێفەكێ پشكدار د فێستیڤالا بازاڕگەڕییا وەلاتێ (مسرێ) دا، ئەوا كو بەری دو حەفتیا ل پارێزگەها دهۆكێ هاتیە ڤەكرن و هەتا نوكە یا بەردەوامە، د دیدارەكێ دا بۆ رۆژنامەیا ئەڤرۆ دیاكر كو ئەڤە بۆ سالا چارێ ل دووف ئێكە ئەو دهێتە دهۆكێ و پشكداریێ دڤێ فێستیڤالێ دا دكەت و ب گۆتنا وی خەلكێ دهۆكێ حەزژ خوارنێن (مسری) دكەن و بكڕێن خوارنێن وی د مشەنە.
شێف (ئەحمەد مسری) گۆت: ئەڤ جارە ژی ب هژمارەكا خوارنێن (مسری) یێن مللی من پشكداری دڤێ فێستیڤالێ دا كریە و خۆشحالم ل گەل برایێن خۆ یێن كورد ل دهۆكێ دڤێ فێستیڤالێ دا پشكدارببم، د هەرسێ فێستیڤالێن سالێن بۆری دا ئەز هاتبووم و هەر جارەكێ من هژمارەكا خوارن و شریناهیان ئەوێن ل (مسرێ) د ناڤدار ل ڤێرە چێكرن و كەیفخۆش بووم دەمێ من دیتی خەلكێ دهۆكێ حەزژ خوارنێن (مسری) دكەن.
هەر وەسا گۆت: بەری ڤێ فێستیڤالێ ئەز هاتبوو هەولێرێ ژی من پشكداری د فێستیڤالەكێ دا كربوو، لێ ئەڤا نوكە ل دهۆكێ بۆ من گەلەك خۆشترە و خۆشیا وێ ئەوە چەند جارەكا ئەز بهێم، یانژی بێژم سال بۆ سالێ دهۆك مەزنتر و جوانتر و خۆشتر لێ دهێت و ئەڤ چەندە دبیتە ئەگەر كو سالانە بهێم پشكدارببم.
