خەلك پتر حەز ژ دیاریێن سروشتی دكەن
عەیشا عەجیب
بارش سەیفەدین حەسەن، خودانێ گولفرۆشیا تودەی فلاوەرس ل زاخۆ، د دیدارەكێ دا بۆ رۆژنامەیا ئەڤرۆ گۆت: ئەڤە ئێك ژ حەزێن من بوو كو ڤی كاری بكەم و جهەكێ فرۆتنا گولێن سروشتی و دیاریان ڤەكەم، لەورا دەمێ دەلیڤە هاتی من دەستپێكر و ئەڤە پێنج سالن من ئەڤ جهە ڤەكری.
هەروەسا گۆت: گولا (رۆز) هەردەم ل پلەیا ئێكێ دهێت بۆ فرۆتنێ، چنكو بێهنا وێ گەلەكا خۆشە و یا سەرنجڕاكێشە، د دووڤدا هندەك گولێن دی، وەكو (لیلیوم و فریزیا) كو وانژی داخوازەكا باش ل سەر هەیە، چنكو بێهنێن وانژی گەلەك دخۆشن، پتریا جۆرێن گولان بوومە ژ هولەندا و توركیا و ئیرانێ دهێن، هندەك ژی یێن مە ب خۆنە، گول ل هەموو دەمان دهێنە فرۆتن، لێ ل هەلكەفتنان پتر داخوازی ل سەر هەنە، بۆ نموونە ل (جەژن و رۆژێن ژدایكبوونێ و رۆژا ئەڤینداران و دەرچۆنێن زانكۆیێ و هەڤژینان و سەرەدانا نەخۆشان) و گەلەك هەلكەفتێن دی و بۆ پاشەڕۆژێ من ل بەرە كارێ خۆ بەرفرەهتر لێ بكەم و پەیاما من بۆ گەنجان ئەوە كو كاربكەن و ژ ئاستەنگان نەترسن و تشتێ گرنگ بەردەوامی و فێربوونە، ئانكو دەستان نە بەردەن هەتا دگەهنە ئارمانجێن خۆ.