خەلکێ کوردستانێ سالانه چەند ھنگڤینی دخون؟
ئەڤرۆ نیوز:
ل گۆرەی ئامارێن وەزارەتا چاندنا حوکمەتا ھەرێما کوردستانێ، نھا نێزیکی ١٤٠ ھزار مێشێن ھنگڤینی ل ھەرێما کوردستانێ ھەنە و ل ژێر چاڤدێریا ١٠ ھزار ھنگەڤانان دھێنە بخودانکرن و چاڤدێریکرن، بەلێ د سەر ھندێ را بەرھەمێ سالانە یێ ھنگڤینێ کوردستانێ ژ ٨٠٠ تەنێن ھنگڤینی نابۆریت، ئەڤە ژی دبیتە ئەگەر کو ھندەک بازرگان قەستا دەرڤەی وەلاتی بکەن و ھنگڤینی دابین بکەن.
رێڤەبەرێ گشتیێ پلان و دووڤچوونێ ل وەزارەتا چاندنا حوکمەتا ھەرێما کوردستانێ راگەھاند، ھژمارەکا مەزن یا ھنگەڤانان ھنگڤینی ژ دەرڤەی وەلاتی دئینن، سەرەرای ھندێ کو ١٠ ھزار ھنگەڤان ل ھەرێما کوردستانێ ھەنە، بەلێ ئەڤ رێژا مەزن یا ھنگەڤانان نەشێن پێدڤیا خەلکێ ھەرێمێ ژ ھنگڤینی دابین بکەن و گۆت: ھەرێما کوردستانێ سالانە پێدڤی ب ھزار و ٢٠٠ تەنێن ھنگڤینی ھەیە ھەتا پێدڤیا خەلکی پێ بھێتە پرکرن، بەلێ ھنگەڤانێن مە ب تنێ دشێت ٨٠٠ ھزار تەنێن ھنگڤینی بەرھەم بینن.
ئەنوەر عومەر بۆ رۆژناما ئەڤرۆ ئاماژە دا وێ چەندێ، نھا د پلانا وەزارەتێ دایە کو رێژا ھنگڤینێ خۆمالی بەر ب زێدەبوونێ بچیت و کارەکێ جدی ژی ل سەر ڤێ چەندێ ھاتیە کرن کو ھەتا سالا ٢٠١٨ رێژا بەرھەمئینانا ھنگڤینێ خۆمالی بگەھیتە ٩٥٠ ھزار تەنان و گۆت: نھا مە دەست پێ کریە کو نێزیکی ١٥٠ ملیۆن دیناران وەکو قەر بدەینە ھنگەڤانان بێکو زیدەھی بچیتە سەر بۆ ھندێ بەرھەمئینانێ د ھنگڤینی دا بکەن، ھەروەسا ل سالا ٢٠١٣ ژی کۆژمێ ٧٢٤ ملیۆن دیناران بۆ ڤێ مەبەستێ ھاتبوو تەرخانکرن و ل سالا ٢٠١٤ ژی کۆژمێ ٣٤٦ ملیۆن دیناران ھاتبوونە تەرخانکرن.
ناڤبری ئەو یەک ژی نەڤەشارت، د چەند سالێن بۆری دا ھنگڤینێ کوردستانێ پشکداری چەند پێشانگەھێن نێڤدەولەتی بوویە و د ھەمخوویان دا ب ھنگڤینەکێ پێشکەفتی و ب کوالێتیەکا بلند ھاتیە نرخاندن و ب باشترین ھنگڤین ل جیھانێ ھاتیە نیاسین و گۆت ژی: ژ ئەگەرێ ئەڤ شەر و شۆرێن ل سەر سنوورێن ھەرێما کوردستانێ ھاتینە کرن، ھژمارەکا مەزن یا مێشێن ھنڤینی ھاتینە کوشتن و تووشی نەخۆشیان بووینە.
رێڤەبەرێ گشتیێ پلان و دووڤچوونێ ل وەزارەتا چاندنا حوکمەتا ھەرێما کوردستانێ دیار کر کو وەزارەتا ب رێژا ٢٥% ھاریکاریێن نوشدار پێشکێشی ھنگەڤانان دکەت بۆ ھندێ مێشێن ھنگڤینی ژ نەخۆشیان قورتال بکەن، بەلێ گەلەک جاران ژی ھنگەڤان گازندا دکەن کو ئەو دەرمانە پێدڤیێن وان پر ناکەن و باوەریا وان ب دەرمانێن بازاری ژی ناھێت و گۆت ژی: بۆھایێ ھنگڤینی ھاودرە بەرامبەر بۆھایێ ھنگڤینێ خۆمالی گەلەک یێ ئەرزانە و ئەو ھنگڤینێ دھێتە ھاودرەکرن گەلەک یێ ئەرزان و بێسەروبەرە و ئەڤە ژی دبیتە ئەگەر کو ھندەک ھنگەڤان ھنگڤینێ خوە سەختە بکەن و ب ئەرزانی بفرۆشن.
خویاژی کر کو ئەڤە ماوەیەکە ل سەر سنوورێن ھەرێما کوردستانێ و ب تایبەت د ناڤبەرا سنوورێن ھەرێمێ و عیراقێ دا قاچاخی ب مێشێن ھنگڤینی دھێتە کرن و ئەڤە ژی مەترسیە ل سەر مێشێن کوردستانێ، چونکو ل ئیرانێ مێشێن ھنگڤینی ب شانەڤە تەڤلی ھەرێمێ دبن و ئەڤە ژی دبیتە ئەگەرێ ڤەگوھاستنا نەخۆشیان بۆ مێشێن ھەرێما کوردستانێ و گۆت: ژبلی ئیرانێ چو وەلاتێن دی نەشێن قاچاخیێ ب مێشێن ھنگڤینی بکەن، چونکو ل ھەموو وەلاتان گەرەنتی ل سەر ھەیە و رێ نادەن ب قاچاخی بھێنە ڤەگوھاستن.
