خەلک دێ ژ قەرێن ئاڤێ ھێنە ئازاکرن
ئەڤرۆ، سالار محەمەد دۆسکی:
ئەندامەکا لژنا باژێرڤانی و گەشت و گۆزارێ ل پەرلەمانێ کوردستانێ ئاشکرا کر، ئەو ل رۆژا ١٥/٢/٢٠٢١ وەزیرێ باژێرڤانی و گەشت و گۆزارێ ل گەل رێڤەبەرێ گشتی ل وەزارەتێ دێ مێھڤانی پەرلەمانێ کوردستانێ کەن و دبێژیت: بابەتێ پیڤەرێن ئاڤا مالان و چەند بابەتێن دی کو ئاریشێن خەلکی نە و گەھشتینە پەرلەمانی، دێ ل گەل بەحس کەین.
کلارا عودیشو یەعقوب، ئەنداما لژنا باژێرڤانی و گەشت و گۆزارێ خویا کر، نوکە کار ل سەر بابەتێ پیڤەرێن ئاڤێ دھێتەکرن و گەلەک وەلاتیێن ھەین گەلەک دەینێن ئاڤێ کەفتینە سەر و نەشێـن بدەن و گۆت: “مە دڤێت ئەو دەین بۆ وەلاتیان بھێتە سڤککرن و دێ داشکاندنەکا مەزن ل سەر ئەوان پاران ھێتەکرن و ھەکە پیڤەرێ ئاڤێ یێ خراب بیت دڤێت جارەکا دی بھێتە دروستکرن”.
گۆتژی: “پێشنیارا مە بۆ وەزارەتێ ئەوە داشکاندنەکا مەزن بۆ وەتیان بھێتەکرن، داکو بشێن بھایێ ئاڤێ ئەوێ قەر ل سەر بدەن”.
ئاشکرا ژی کر، پیڤەرێن ئاڤێ ھندەک ب ھەوای کار دکەن و ھندەک کار ناکەن و خەلک ژی ھەیە نزانن ئابووریێ د ئاڤێ دا بکەن، لەو گرنگە رەوشەنبیری بۆ خەلکی بھێتە دروستکرن، ئاریشە ل نک کۆمپانیێ و وەلاتیان ھەیە، راستە پیڤەرە بۆ وێ چەندێ یە وەلاتی ئابووریێ د مەزاختنا ئاڤێ دا بکەن و ب ھەدەر نەدەن و گۆت: “ھەکە پیڤەرێ دروست بیت، ھەیڤانە بھایێ ئاڤێ ناگەھیتە ١٢ ھزار دیناران، دڤێت دادپەروەری د پیڤەران دا ھەبیت، شێوازێ دانانا پیڤەران شاشی تێدا ھەبوون و زێدەتر بۆ حکومەتێ ڤەدگەرن”.
کلارا خانێ گۆت: “وەکو لژنا باژێرڤانیێ مە کۆمبوون ل گەل وەزیری و رێڤەبەرێن گشتی کرینە و بابەت گەلەک ب رژدی ھاتیە وەرگرتن و رێکخستنەکا باش د کابینا نوو یا حوکمەتێ دا بۆ ڤی بابەتی ھاتیەکرن”.
گۆتژی: “مزگینیا من بۆ خەلکی ئەوە، ئەو قەرێن ل سەر خەلکی دێ گەلەک ھێنە کێمکرن و دێ رێژەکا مەزن یا قەرا ھێتە ئازاکرن، ب مەرجەکی کێشا پیڤەرێن خوە چارەسەر بکەن”.
