خەما مەزنيا رێبەرێن رێبازا بارزان بتنێ خەما خەلكی و خزمەتكرنا ملەتییە
عەبدولعەزیز محسن بارزانی
هەلبەتە یا ب ساناهی نینە مرۆڤ بشێت ب دروستی ل سەر خەبات و تێكۆشین و هزر و میتۆد و رێك و رێبازا بارزان و فەلسەفا وێ بنڤیسیت. لێ ئەگەر ب كورتی و ب كوردی هندەك میناكێن رێبەرێن رێبازا بارزان ل سەر هندێ كو خەلك بۆ وان ڤەگەر بوویە و گرنگی ب مللەتی دایە، دێ دیاركەین و پێكڤە گرێدانا وان ب هەرسێ بنەمایێن رێبازا بارزانی ڤە نیشا بدەت؛ ئەو ژی: خودێ نیاسی و خودێ پەرێسی ـ نیشتیمانپەروەری ـ مرۆڤدۆستی و پێكڤەژیان. دێ ئەڤە ژێ دروست بیت:
رێبەڕێن رێبازا بارزانی ب رێزبەندی و ل قووناغێن جودا جودا یێن ژیانێ دا و هەر ئێكێ ب رەنگەكێ ب رژدی ل سەر داخوازیێن خەلكی و مللەتێ كورد راوەستیاینە و ب دەنگێن بلند گۆتینە، ل دەستپیێكێ هەكە میناكا شێخ عەبدولسەلام بارزانی بینە زمان، یاداشتەكێ ددەتە دەولەتا ئوسمانیان و تێدا داخوازا مافێن مللەتێ كورد و خەلكێ كوردستانێ دكەت، ل سەر وێ چەندێ خیانەت لێ دهێتەكرن و گەردەنا رۆژێ ماچی دكەت و شەهید دبیت. ل دویڤدا ژی؛ شێخ ئەحمەدێ بارزانی یە كو د فۆڕم و ریفۆڕمێن جوداجودا دا كو خزمەتا مللەتی بهێتەكرن و باشترین چاكسازی د خزمەتا خەلكی دا كرین و خەلك بەر ب ئاراستەیێن نموونەیی ڤە برینە و گۆتیە(ئەم ب مللەتی و مللەت ب مە) واتە دو بازنەیێن پێكڤە گرێدایی و چو جاران ل گەل مللەتی ژێك ناهێنە جوداكرن.
پاشی خوەدیێ قووناغا هەری وەرچەرخینەر دهێت كو نەمر (مەلا مستەفایێ بارزانی) یە، ئەڤی زاتێ مەزن و كەسایەتیێ كارتێكەر دو ئاخفتنێن گەلەك مەزن هەنە كو ئێك ژ وان دبێژیت(ئەگەر هێزا مللەتی د گەل مە دابیت، هیچ هێزەك نەشێت مە بشكینیت) واتە هەردەم هێزا خۆ ژ مللەتێ خۆ وەردگرن و پێدڤی و داخوازیێن خەلكی دبنە بەرنامە و پلان بۆ زێدەتر خزمەتكرنا وان. دیسا جەنابێ وان دبێژیت(شانازیە مرۆڤ خزمەتكارێ مللەتێ خۆ بیت)، ئەڤ ئاخفتنا تە ژی رامان بوویە درووشمێ سەرەكیێ دەزگەهێ خێرخوازیی یێ بارزانی كو ب پڕاكتیكی خزمەتا مرۆڤایەتیێ و هەر چار پارچێن كوردستانێ پێ دكەن. هەلبەت بەردەوامیدانا ڤێ قووناغێ هەلگرێ هەمان پەیامێ یە كو ژیەكێ كورت هەبوو لێ بەرهەمەكێ مەزن هەبوو ئەو ژی جانەمەرگ (ئیدریس بارزانی) بوویە، ئێك ژ ئاخفتنێن گەلەك كارتێكەر و واقعی دەمێ دبێژن (ئیدریس بارزانی بابێ هەژار و پەناهندە و ئاواران)، واتە د هزر و فەلسەفا ناڤبری دا، هەردەم دڤێت خزمەتا خەلكی بهێتەكرن، ب تایبەت ژی خەلكێ هەژار و نەدار و دەستكورت. لەورا هەردەم خەلكی و مللەتێ كوردستانێ ئەڤ رێبەرە ب رێبەر و سەركێش و سەركردێن خۆ زانینە. ژبەر قەدەرا سەخت گەلەك د ژیانێ نەما لێ رۆلێ سەڕۆك و رابەرێ مللەتێ كورد مەسعود بارزانی ژی هات، هەكە ئاوریەكێ لدوماهی گۆتارا جەنابێ وان دا ل رێورەسمێن ب دوماههاتنا خولا(20) یا پەیمانگەها پێگەهاندنا كادران گۆت:(هەڕنە د ناڤ مللەتی دا. چونكو ئەگەر مە ئەڤ مللەتە هەبیت ژ بلی خۆدێ؛ مە منەت ب هیچ كەسەكێ نینە)، ئەڤێ وێ چەندێ نیشا مە ددەت كانێ خەلك و مللەت ب هزر و تێگەهشتنا جەنابێ سەرۆك بارزانی دا چەند د مەزن و گرنگ و پیرۆزن. كو هەردەم پشتگەرمێ گەلێ خۆ بوویە. دیسا نێچیرڤان بارزانی ژی ئێك ژ ئاخفتنێن وانێن كارتێكەر دەمێ دبێژیت (ئەگەر ئەڤ مللەتە ل پشتا مە بیت، هەردەم پشتا مە دێ ل چیایێن كوردستانێ بیت)، واتە ب رامانا هندێ مادەم خەلك و مللەتێ كوردستانێ د گەل رێبەرێن ڤێ رێبازێ دانە دێ ئەڤ مللەتە پشت قایم بیت. ناڤبری هەردەم دبێژیت هیڤی و ئومێدێن مە خزمەتكرنا گەلێ كوردستانێ یە ب هەمی پێكهاتەیێن نەتەوەیی و ئایینی و مەزهەبی.
میناكێ مژارێ و سەرەدانا داویێ
(مـەسـرۆر بـارزانـی)
ل دوماهییا هەیڤا دەهـ یا سالا ٢٠٢٦ رێزدار مەسرۆر بارزانی ل گۆرەی بەرنامە و پلانەكا دارێژتی، سەرەدانا دەڤەرا بەهدینان كر و ل گەل لایەنێن حزبی و حكومی و ئەولەهی و لەشكری و میدیایێ و تەخ و چینێن جڤاكی كۆم بوو. جەنابێ وان د هەمی روینشتنێن خۆدا دگۆت: ئەز یێ هاتیم گوهداریا هەوە بكەم. چونكو خەلك و مللەتێ ڤێ دەڤەرێ حەقێ ل سەر مە هەیە و د رۆژێن تەنگاڤییان دا خەلكێ ڤێ دەڤەرێ ب پلە ئێك د هەوارا مە هاتینە. لەورا ئەم چەند خزمەتا خەلكێ ڤێ دەڤەرێ بكەین هێشتا كێمە. ئەڤ باوەریا مەزنا د ناڤبەرا رێبەرێن رێبازا بارزانی دا و خەلكێ دەڤەرا بەهدینان دا هیڤێنێ هەمی سەركەفتنایە. جەنابێ وان گەلەك ل سەر خۆ و گەلەك ب تەكەزی؛ گوهداریا داخوازی و پێدڤی و گلەیی و گازندێن خەلكی كرن و خەلك ژی گەلەكێ ب هیڤی و ئۆمێدە كو ل دەمێن بهێت دا ئەوا د شیان دا بیت دێ بنە بڕیار د خزمەتا خەلكی دا. ئەڤجا ئەڤا من گۆتی بتنێ من ڤیایە بیرا راییا گشتی بینمەڤە و داخوازێ ژ مێژوونڤێسان دكەم ئەو سەر قەلەمكێن من نڤیسین، بلا خال ب خال ب درێژی و ب دێكیۆمێنت ڤە بێخنە سەر لاپەڕێن رۆژنامە و كۆڤاران بۆ هندێ هێشتا راستی بۆ خەلكی دیار ببیت؛ كانێ چاوا ئەڤە زێدەتر ژ (100) سالانە رێبەرێن رێبازا بارزان، خەما من بتنێ خەما مللەتێ كورد و گەلێ كوردستانێ یە. ژ بەر هندی ب ملیۆنان مرید و خۆبەخش و فیدایێن هەیین. ئەز ژی ئێك ژ پڕۆژێن شەهیدبوونێ مە ل پێناڤێ پاراستن و سەركەفتنا رێبازا بارزان.
