داخویانیا پەرلەمانتارەکێ دەم پارتیێ دبیتە ئەگەرێ تووڕەبوونا کوردان
ئەندامەکێ پەرلەمانێ تورکیا سەر ب فراکسیۆنا دەم پارتی دیار دکەت قووناغا نها بۆ کوردان دووماهی دەلیڤە یە و کوردێن ڤێ یەکێ قەبوول نەکەن بلا بەرێ خوە بدەنە چیا و ئەو یەک ژی بوویە ئەگەرێ دلگرانی و توورەبوونا کوردان.
جەنگیز چاندار ئەندامێ پەرلەمانێ تورکیا سەر ب فراکسیۆنا دەم پارتی بۆ کەنالێ میدیا سکۆپ دیار کر، قووناغا نها ل تورکیا دەستپێکریە د بەرژەوەندیا هەموو ئالیان دایە، چونکی ل تورکیا ب سالانە شەڕ هەبوو و زیانێن گەلەک مەزن ژی گەهشتنە تورکیا و گۆت: (سەرۆکێ پەکەکێ ل ئیمرالیێ یە، ئەو بریارێن سەرەکی ددەت، هەروەسا سەرکردایەتیا پەکەکێ ژی ل قەندیلی یە و ئەو بریارێن ئاپۆی بجه دئینن، بەری نها ئاپۆ بریار دایە پەکەکە خوە هەلوەشینیت و دووماهیێ ب شەڕێ چەکداری بینیت و سەرکردەیێن پەکەکێ ژی ئەو یەک بجهئینان و نها ژی قووناغەکا نوو دەستپێکریە).
ناڤهاتی د بەردەوامیا ئاخڤتنا خوە دا ئەو یەک ژی دیار کر، هندەک کەس نها ل دژی قووناغا ئاشتیێ نە و رۆژانە ژی ل کەنالێن راگەهاندنێ دژبەریێ دکەن، یا نها ل تورکیا روو ددەت کارەک گەلەک باشە، ب هزاران گرتیێن سیاسی دێ هێنە ئازاد کرن، یێن ل ئۆرۆپا دێ ڤەگەرنە ڤە تورکیا، ئانکۆ دێ تشتێن گەلەک باش روو دەن، ڤێجا نزانم کا بۆچی هندەک دژبەریێ دکەن و گۆت: (یێن ل دژی قووناغا ئاشتیێ نە بلا بەرێ خوە بدەنە چیا، رێیا چیا دیارە و هەکە نە بلا پشتەڤانیێ ل قووناغا نها بکەن، وەکو دی چو رێیێن دی نینن و ئێدی یا نها ل تورکیا روو ددەت دەستپێکەکا نوو یە و دێ گەهیتە ئەنجامەک باش ژی).
پشتی داخویانا جەنگیز چانداری ب سەدان سیاسەتمەدار، چالاکڤانێن سیاسی و رەوشەنبیرێن کورد ل تورکیا و ئۆرۆپا دژبەریا خوە ل هەمبەر هەلوەستێ چانداری دیار کرن و راگەهاندن کو دڤێت جەنگیز چاندار داخوازا لێبۆرینێ ژ گەلێ کورد بکەت.
د ڤێ دەربارێ دا خەیروللا ئورهان وەلاتیێ کورد یێ باکورێ کوردستانێ دیار کر، مخابن دەم پارتی سیاسەتەکا گەلەک شاش برێڤە دبەت، ب دەهان کەسێن تورک د چەند سالێن بۆری دا ب دەنگێ کوردان چوونە پەرلەمانێ تورکیا و پاشی ژی دژبەریا مافێن رەوا یێن گەلێ کورد کرن، بەری نها ژی کەسێن وەکو چانداری دژبەریا مافێن کوردان کرینە و گۆتینە نابیت پەروەردەیا ب زمانێ کوردی ل تورکیا هەبیت و نها ژی چاندار کو پەرلەمانتارێ دەم پارتی یە یێ دبێژیت هەکە کورد خوە رادەست نەکەن بلا بچنە چیا و گۆت: (کەسێن وەکو چانداری ئەو مافە نینە کو ب جهێ گەلێ کورد بریارێ بدەن، کوردان ل تورکیا هەردەم داخوازا ئاشتیێ کرینە، لێ یا نها ل تورکیا روو ددەت ب دلێ کوردان نینە و کوردان هەتا نها ژ بۆ ئازادیا خوە گەلەک قوربانی داینە و مافێ گەلێ کوردە کو خوەدان ژ خوونا شەهیدێن خوە دەرکەڤیت و سکڤاتیا کو چانداری کری ناهێتە قەبوول کرن و دڤێت داخوازا لێبۆرینێ بکەت).
عەلی گوچمەن چاڤدێرێ سیاسی ژی دیار کر، کوردان گەلەک تێبینی ل سەر قووناغا نها هەنە، ئەو یەک ژی مافێ کوردانە، چونکی ب سالانە خەباتەک مەزن هاتیە کرن، ب هزاران لاوێن کورد شەهید بووینە، هەروەسا چەند هزار گوندێن کوردان وێران بووینە، نابیت نها ب ناڤێ ئاشتیێ کورد هەر تشتەکێ قەبوول بکەن و چ نەگەهیتە کوردان و گۆت: (کەسێن وەکو چانداری بەری نها ژی گەلەک تشت گۆتینە، لێ کورد قەبوول ناکەن، یا نها دهێتە کرن رێککەفتنەکە د ناڤبەرا ئیمرالیێ و دەولەتێ دا، کورد نەچار نینن هەموو تشتان قەبوول بکەن، راگرتنا شەڕی تشتەک باشە، لێ دڤێت ئاشتی ژی بۆ هەر دو ئالیان بیت، ئانکۆ ل هەمبەر قوربانیێن کو گەلێ کورد داینە دڤێت د دستوورێ تورکیا دا مافێن گەلێ کورد بهێنە گەرەنتیکرن، هەکە ئیمرالی بەحسێ کوردان نەکەت ژی ئەو یەک رامانا هندێ نادەت کو دێ کورد دەست ژ مافێن خوە یێن رەوا بەردەن).
ل ئالیێ دی ب هزاران وەلاتیێن کورد یێن باکورێ کوردستانێ نەرازیبوونا خوە ل هەمبەر داخویانیا جەنگیز چانداری دیار کرن و داخواز ژ سەرکردایەتیا دەم پارتی کرن کو ل هەمبەر سکڤاتیا چانداری ل هەمبەر گەلێ کورد بێدەنگ نەمینن و دڤێت چاندار ب فەرمی داخوازا لێبۆرینێ ژ گەلێ کورد بکەت، هەکە ئەو یەک نەهێتە کرن دەنگدەرێن دەم پارتی ژی دێ هەلوەستێ خوە هەبیت، چونکی چاندار ب دەنگێ کوردان بوویە ئەندامێ پەرلەمانێ تورکیا و هەر کەس دزانیت هەکە ب دەنگێ کوردان نەبا ئەو نەدچوو پەرلەمانێ تورکیا، جەنگیزا چاندار نها نوونەرێ کوردان نینە و بوویە پشکەک ژ سیاسەتا دەولەتا تورکیا ل دژی مافێن رەوا یێن گەلێ کورد ل تورکیا و دڤێت سەرکردایەتیا دەم پارتی خوەدان هەلوەست بیت.
