داستانێن پردێ و سحێلا؛ خالێن وەرچەرخانا دیرۆکی و سەرکەڤتنا ئیرادەیا گەلێ کورد بوون
دلۆڤان ئاکرەیی
ڕوودانێن پشتی ریفراندۆما سەربەخۆیا کوردستانێ نە تنێ تاقیکرنەکا سەخت یا سیاسی بوو، بەلکو هەڕەشەیەکا توند بوو ل سەر مانا هەرێما کوردستانێ و قەوارێ وێ یێ دەستووری، ل ناڤەندا ڤێ تاریکییا سیاسی دا، داستانێن پردێ ل ٢٠ێ چریا ئێکێ ٢٠١٧ و سحێلا و مەحموودی یە ل ٢٦ چرنا ئێکێ دا، بڕیارا دووماهیێ ل سەر نەخشەیا جیۆپۆلەتیکی یا دەڤەرێ دان و خالا وەرچەرخانا دیرۆکی تۆمارکر و پشتی ڕوودانێن ١٦ چریا ئێکێ، و هێرشێن هێزێن حەشدا شەعبی و بێدەنگیا هێزێن هەرێمی و نێڤدەولەتی، ئەگەر بوون کو سۆپایێ ئیراقێ و گرۆپێن چەکدار ب پشتەڤانیا لۆجستی و ڕاوێژکاری یا سوپایێ پاسداران، ب غرورەکا مەزن یا سەربازی بەرەڤ هەولێرێ بلڤێن و ئامانجا ستراتیژی ل داگیرکرنا پردێ، بتنێ گرتنا دەڤەرەکا جوگرافی نەبوو، بەلکو ژناڤبرنا بنەمایێن پایتەختێ هەرێما کوردستانێ و هەلوەشاندنا سەرجەم دەستکەڤتێن دەستووری بوون، ل ٢٠ چریا ئێکێ ٢٠١٧، ل میحوەرێن پردێ و ئاڵتون کۆپری، تێکشکاندنا تانکێن ئەبڕامز و زریپۆشێن پێشکەفتی یێن سۆپایێ ئیراقێ ژ لایێ هێزێن پێشمەرگەیێن کوردستانێ ڤە، هەڤکێشا سەربازی گوهۆڕی و ژ ڕوویێ سەربازی ڤە، شکەست پێئینانا ڤێ هێرشێ نە تنێ هەڤسەنگیا هێزێ ل سەر ئەردی زامن کر، بەلکو پەیامەکا گشتگیر ئاراستەی جڤاکێ نێڤدەوڵەتی و هەڤڕکێن هەرێمی کر کو ڕادەستبوونا سیاسی ل دەف گەلێ کوردستانێ نینە. ئەگەر پردێ ڕاگرتنا ڕەوتا داڕمانێ و هێلا ئێکێ یا بەڕەڤانیێ بیت ل وی دەمی سحێلا و مەحموودیە گۆڕەپانا ئێکلاکرنا ئیرادەیا مانا خۆ بوون کو پلانا نەیاران ل میحوەرێ سحێلا پێکدهات ژ بڕینا خۆینبەڕا پەیوەندیێن نێڤدەولەتی یێن هەرێما کوردستانێ دەرگەهێ ئیبراهیم خلیل و دۆرپێچدانا سێگۆشەیا سنووری ل گەل تورکیا و سووریا، ل ٢٦ چریا ئێکێ ٢٠١٧، ل داستانا سحێلادا، بەرەڤانیا هێزێن پێشمەرگەی و لێدانا گورزێن کوشندە ل ئێکەیێن زریپۆش یێن هێزێن هێرشبەر، ئەو چەند سەلماند کو شکەستنا سیاسی ناهێتە ڤەگۆهاستن بۆ تەسلیمبوونا ئیرادەیا سەربازی، سحێلا دووماهی ب غرورا سەربازی یا حەشد و سوپایێ ئیراقێ ئینا و ناچارکرن کو پشت ب بژارەیا دانوستاندنێن سیاسی ببەستن ل جهێ ژناڤبرنا جەستەیی. ل پەرتووکا بۆ دیرۆکێ دا، سەرۆک بارزانی رۆناهی بەردایە سەر نامە گوهۆڕینەکا ستراتیژی ل گەل نوونەرێ بلند یێ دیپلۆماسی یێ ئەمریکا ل بەغدا پشتی قۆناغا ریفراندۆمێ کو ل ڕۆژا ١٧ێ تشرینا ئێکێ دا، باڵیۆزێ ئەمریکا ل بەغدا دۆگلاس سلێمان پەیامەک ئاراستەی جەنابێ سەرۆک بارزانی کربوو و تێدا هاتبوو دونیا هاتیە گوهۆڕین، ئەڤڕۆ نە دوهییە، پێدڤییە ب خۆ دا بچنەڤە، بەلێ بتنێ پشتی سێ ڕۆژان، ل ٢٠ێ چریا ئێکێ و ل سایەیا خۆڕاگری و سەرکەڤتنا مەزن یا هێزێن پێشمەرگەی ل داستانا پردێ دا، بەرسڤەکا ئێکلاکەر ئاراستەی دۆگلاس سلێمانی هاتیە کرن و سەرۆک راگەهاند: ب جەنابێ باڵیۆزی رابگەهینن: ئەڤڕۆ نە دوهییە و سوبەهی ژی وەک ئەڤڕۆ نابیت، ئەڤ بەرسڤا دیرۆکی یا سەرۆک بارزانی، وەرچەرخانەکا فکری و سیاسی بوو کو سەلماند ئیرادەیا گەلەکی کو خودانێ داستانێن پردێ و سحێلایە، قەبارەیێ هەڕەشێن دەرەکی قەبوول ناکەت، داستانا پردێ و سحێلا نە تنێ ژ بۆ بەرەڤانیا سەربازی ل دو دەڤەرێن جوگرافی ڕوودان، بەلکو بڕیارەکا دیرۆکی و ستراتیژی بوون ژ بۆ پاراستنا کەرامەت، خاك و هەڤسەنگیا سیاسەتا هەرێمی، ڤان هەر دوو داستانان چەمکێ شکەستێ پشتی ١٦ێ تشرینا ئێکێ هاڤێتە زبڵدانا دیرۆکێ و سەلماند کو ئیرادەیا ڕزگارخوازییا گەلێ کورد، ب زریپۆش و تەکنەلۆژیا سەربازییا هاوردە ناچەمیت و نەچەمیایە.
