داعش ئه‌ڤرۆ ل مووسل ب رێيا مزگه‌فتان ئه‌ڤ گه‌فه كر
به‌رپرسێ لقا 14 يا پارتى ديموكراتى كوردستان ل مووسل، راگه‌هاند كو ئه‌ڤرۆ ب رێيا مزگه‌فتان چه‌كدارێن داعش گه‌ف ل رۆژنامه‌ڤانان كرن.
عسمه‌ت ره‌جه‌ب، به‌رپرسێ لقا 14 يا پارتى ديموكراتى كوردستان ل مووسل، بۆ ئه‌ڤرۆ نيوز گۆت: “ئه‌ڤرۆ رێكه‌فتى 7ى گۆلانا 2015ێ چه‌كدارێن تيرۆرستێن داعش ل ناڤا باژێرێ مووسل ب رێيا مايكرۆفۆنێن مزگه‌فتان گه‌ف ل رۆژنامه‌ڤانێن مووسل كرن”.
به‌رپرسێ لقا 14 يا پارتى ديموكراتى كوردستان ل مووسل زێده‌تر گۆت: “چه‌كدارێن داعش داخواز كر كو د ماوێ پێنج رۆژان دا، هه‌ر چ رۆژنامه‌ڤانێ ل ناڤ مووسل هه‌يه و ژ چ ره‌گه‌زێ بيت، پێدڤيه بچيت و خوه راده‌ستى وان بكه‌ت”.
عسمه‌ت ره‌جه‌ب دا زانين ژى كو ئه‌گه‌رێ ڤێ گازيكرنێ نه‌هاتيه زانين ب تنێ داخوازى كريه، ئه‌ڤ گه‌فا وان د ده‌مه‌كى دايه كو چه‌كدارێن داعش ل ماوێ بۆرى چه‌ندين رۆژنامه‌ڤانێن وى باژێرى كرينه ئارمانج و وه‌كو راپۆرتێن نێڤده‌وله‌تى دده‌نه زانين كو نوكه مووسل بوويه گۆرستانا رۆژنامه‌ڤانان.
