داعش ب ده‌هان ته‌رمێن خوه د جهدا هێلان
ئه‌ڤرۆ نیۆز، قائید میرۆ
شه‌ڤا بۆری تیرۆرستێن داعش بشێوه‌یه‌كێ پیلان دارشتی هێرشی سه‌ر میحوه‌رێن پێشمه‌رگه‌ی ل به‌نداڤا مووسل و بلنداهیێن بادۆش كر و د ئه‌نجامدان ب ده‌هان ته‌رمێن خوه هێلان و تووشی شكه‌ستنا مه‌زنبوون.
ژێده‌ره‌كێ پێشمه‌رگه‌ی بۆ ئه‌ڤرۆ نیۆز به‌حسێ هێرشێن شه‌ڤا بۆری كر و راگه‌هاند” ژبه‌ركو دنیا مژ و تاریبوو داعش هه‌موو هێزێن خوه كۆمكرن و هێرشی سه‌ر پێشمه‌رگه‌ی كر، ژبه‌ر ره‌وشا سه‌قای پێشمه‌رگه‌ی ده‌ستپێكێ نه‌دزانی دێ هێرشێ بكه‌ن و چه‌كدارێن داعش ب رێیا قادرما( په‌یسك) سه‌ركه‌فتبوونه ناڤا ساترێن پێشمه‌رگه‌یی و شه‌ڕه‌كێ ئێكجار دژوار ناڤبه‌را پێشمه‌رگه و داعش چێبوو، د ئه‌نجامدا پێشمه‌رگه‌ی هێرشا داعش ل هه‌موو لایه‌كیڤه شكاندن و ب ده‌هان ته‌رمێن داعش كه‌فتنه بن ده‌ستێ پێشمه‌رگه‌ی، به‌لێ پتریا وان خۆكوژبووینه و پارچه‌یێن له‌شێ وان ژی نه‌ماینه له‌وڕا هژمارا كوشتیێن داعش ب ده‌هان چه‌كداربووینه.
عه‌قید دلشاد مه‌ولوود، فه‌رماندێ پێشمه‌رگه‌ی بۆ ئه‌ڤرۆ نیۆز دیاركر” داعش دخوازیت تولا شنگالێ ڤه‌كه‌ت و هه‌موو هێزا خوه بكاردئینیت، لێ به‌رده‌وام پێشمه‌رگه یێ هێرشێن وان پاشڤه دبه‌ن و ئه‌ڤ هێرشا ئێڤاریا دوهی و شه‌ڤا بۆری زنجیره‌ك هێرشێن ئێكجارمه‌زنبوون و شكه‌ستن ئینا.
