داعش ب شه‌ش خۆكوژان هێرش كره سه‌ر كه‌ربه‌لا
ئه‌ڤرۆ نيوز:
رێكخراوا داعش سپێده‌هيا ئه‌ڤرۆ د رێيا شه‌ش خۆكوژان دا هێرش كره سه‌ر كه‌ربه‌لا و د ئه‌نجام دا، 11 كه‌س كوشتن و 14 كه‌س ژى بريندار بوون.
ژێده‌رێن ده‌نگوباسێن عيراقى به‌لاڤكر كو سپێده‌هيا ئه‌ڤرۆ د رێيا شه‌ش خۆكوژان دا و كه‌مه‌رێن مينرێژكرى داعش بزاڤكرن كو بچنه ناڤ باژێرێ كه‌ربه‌لا كو يا هه‌ڤده‌مه ل گه‌ل ساخكرنا بيره‌وه‌ريا چلينه‌يا شه‌هيدكرنا ئيمام حسێن كو ب سه‌دان هزار وه‌لاتيێن شيعه مه‌زهه‌ب ل سه‌رانسه‌رى جيهانێ ل وێرێ نه.
هه‌ر ڤان ژێده‌ران دايه زانين ژى كو داعش د ڤيا ب رێيا ڤان چه‌كدارێن خوه د ناحيا عه‌ين ته‌مه‌ر دا بچنه ناڤ باژێرێ كه‌ربه‌لا، به‌لێ ل ده‌ڤه‌را حه‌ى جيهاد ژ لايێ هێزێن ئه‌منى ڤه هاتنه دوورپێچكرن و هه‌موو هاتنه كوشتن.
ب گۆره‌ى ژێده‌رێن ميديايێن عيراقى پشتى شه‌ر و پێكدادان د ناڤبه‌را هه‌ردو لايان دا روودايى چه‌كداره‌كێ داعش خوه په‌قاند و بۆ ئه‌گه‌رێ كوشتنا 11 كه‌سان و برينداربوونا 14 كه‌سێن دى.
