داعش تووشی قەیرانا دارایی بوویە
ئەڤرۆ:
جەنەرال ئالن جۆن بەرپرسێن ھەماھەنگیا ئۆپەراسیۆنێن ھێزێن ھەڤپەیمان یێن ل دژی داعشێ بۆ کۆڤارا شپیگل یا ئەلمانی دیار کر کو شەرێ ھێزێن ھەڤپەیمان و پێشمەرگەھێن کوردستانێ زیانێن مەزن گەھاندنە داعشێ و ب تایبەتی گەلەک بیرێن نەفتێ یێن داعشێ ژناڤ چوون و نھا سەرکردێن داعشێ نەشێن وەک بەرێ مووچە بدەنە ئەندامێن خوە و گۆت: (داعش تووشی قەیرانەکا دارایی یا مەزن ھاتیە و ژ بەر ڤێ یەکێ ژی گەلەک ئەندامێن بیانی یێن داعشێ درەڤن و بەرێ خوە ددەنە وەلاتێن خوە و وەک بەرێ ئێدی کەس ناچیتە ناڤ وێ رێکخراوا تیرۆرستی و ھەکە ب ڤی رەنگی بەردەوام بیت داعش دێ د ناڤا خوە دا تووشی ئالۆزیێن گەلەک مەزن بیت و رەنگە شەرێ ناڤخوەیی ژی ل ناڤ وێ رێکخراوێ دەستپێ بکەت).
ناڤھاتی د بەردەوامیا ئاخڤتنا خوە دا ئەو یەک ژی دیار کر کو شەرێ ھەتا نھا ل دژی داعشێ ھاتیە کرن گەلەک سەرکەڤتی بوویە و دڤێت ستراتیژیا شەری یا ل دژی داعشێ بھێتە بەرفرەھکرن و وەسا بەردەوام بیت، چونکو نھا ئەو دەمێ ئابوورێ وێ رێکخراوێ نەبیت نەشێت خوە ب ھێز بکەت و ئەڤە ژی دێ دەلیڤەکا خوەش بدەتە ھێزێن ھەڤپەیمان و وەلاتێن رۆژھەلاتا ناڤین یێن کو شەرێ داعشێ دکەن دا بشێن ب ساناھی وان تیرۆرستان ژ ئاخا خوە دەربخینن و گۆت: (دڤێت ل سووریێ ژی وەک عیراقێ رژێما سووریێ و ھێزێن بەرھنگار پێکڤە ل دژی داعشێ شەری بکەن، چونکو ھەتا داعش ژناڤ نەچیت چو سیستەمێن نوو ل سووریێ ئاڤا نابن و ژ بەر ڤێ یەکێ دڤێت بەرەیەکا مەزن ل ناڤ سووریێ ل دژی داعشێ بھێتە ئاڤاکرن).
بەری نھا ژی چەندین دەزگەھێن راگەھاندنا ئورۆپا و ئەمریکا دیار کربوون کو ژ بەر نەبوونا پارە و ئیمکانێن کو بەرێ ئەندامێن داعشێ ھەبوون نھا رێژا چوونا کەسێن نوو بۆ ناڤ داعشێ گەلەک کێم بوویە و ب تایبەتی ژ ئەمریکا و ئورۆپا رێژا چوونا ناڤ داعشێ گەلەک کێم بوویە و گەلەک کەسێن کو بەرێ چووبوونە ناڤ وێ رێکخراوێ ژی نھا جودا دبن و ئەڤە ژی دربەکا مەزنە بۆ وێ رێکخراوێ.
